စစ်ကိုင်းတိုင်း၊ ကသာခရိုင်၊ ကသာမြို့၌ ၂၀၁၄ ခုနှစ်၊ နိုဝင်ဘာလ ၂၅ ရက်နေ့မှ၂၇ ရက်နေ့အထိ (၃)ရက်တိုင်တိုင် ကျင်းပပြုလုပ်ခဲ့သည့် စစ်ကိုင်းတိုင်းဒေသကြီး ကုန်သွယ်မှုမြှင့် တင်ရေးဦးစီးဌာနမှ ကြီးမှူး၍ ကြံစိုက်ပျိုး ထုတ်လုပ်သူ များနှင့် ပြောင်း/နှမ်း သီးနှံစုံ စိုက်ပျိုးထုတ်လုပ်သူများ အသင်းတို့ ပူးပေါင်း ကျင်းပသော ကြံစိုက်ပျိုး ထုတ်လုပ်မှုနှင့် တန်ဘိုးမြှင့် ထုတ်ကုန်များ နည်းပညာ ပေးသင်တန်းတွင် စစ်ကိုင်းတိုင်းဒေသကြီး၊ စားသုံးသူရေးရာ ဦးစီးဌာနမှ စားသုံးသူ အကာ အကွယ်ပေးရေး အကြောင်းနှင့် ပို့ကုန်၊ သွင်းကုန် လုပ်ထုံးလုပ်နည်း များအကြောင်း သွားရောက် ပို့ချခဲ့ပါသည်။
အဆိုပါ သင်တန်း၌ ၂၀၁၄ ခုနှစ်၊ နိုဝင်ဘာလ ၂၇ ရက်နေ့ နေ့လည် (၁) နာရီအချိန် စစ်ကိုင်းတိုင်း ဒေသကြီး စားသုံးသူရေးရာ ဦးစီးဌာနမှ ဦးစီးအရာရှိ ဦးသိန်းစိုးက စားသုံးသူ အကာအကွယ်ပေးရေး လုပ်ငန်းစဉ် များအကြောင်း ရှင်းလင်းပြော ကြားရာတွင် ရှေးဦးစွာ ပြောင်းလဲလာသည့် လူနေမှုစနစ် များနှင့်အညီ နိုင်ငံတကာ နှင့်အဆင့်မီ စားသုံးသူ ကာကွယ်ရေး လုပ်ငန်းများ ဆက်စပ်ဆောင် ရွက်နိုင်ရန် စားသုံးသူရေးရာ ဦးစီးဌာနကို စတင်ဖွဲ့ စည်းဆောင်ရွက်ခဲ့မှုများ၊ စားသုံးသူ အကာ အကွယ်ပေး ရေးဥပဒေ ပြဌာန်းပြီးဖြစ်၍ တိုးမြှင့်ဆောင်ရွက် မည့်လုပ်ငန်းစဉ်များ၊ နည်းဥပဒေ ပြဌာန်းနိုင်ရန် ကြိုးစား ဆောင်ရွက်နေမှုများ၊ စားသုံးသူ၏ အခွင့်အရေးများ၊ စီးပွားရေး လုပ်ငန်းရှင်များ၏ တာဝန်နှင့် အခွင့်အရေးများ အကြောင်း၊ အာဆီယံနိုင်ငံများနှင့် ပူးပေါင်းဆောင်ရွက် နေမှုများအကြောင်း ရှင်းလင်း ပြောကြားပြီးနောက် စားသုံးသူကို အန္တရာယ် ဖြစ်စေသော အစားအသောက်များ၊ လူသုံးကုန်စည်များ၊ ဝန်ဆောင်မှုများနှင့် မူမမှန်သည့် ဖျော်ဖြေ တင်ဆက်မှု အကြောင်းများကို လတ်တလော ဖြစ်ပျက်နေသည့် အချက်အလက် များနှင့်နှိုင်းယှဉ်လျက် အကျယ်တဝင့် ဟောပြောပို့ချခဲ့ပါသည်။
ဆက်လက်၍ ကြံစိုက်ပျိုး ထုတ်လုပ်သူများနှင့် ပြောင်း/နှမ်းသီးနှံစုံ စိုက်ပျိုးထုတ်လုပ် သူများအားဈေးကွက် အမြင်ကျယ်ပြန့်စေရေး ရည်ရွယ်လျက် ပို့ကုန်၊ သွင်းကုန် လုပ်ထုံးလုပ်နည်းများ အကြောင်း ဆက်လက်ဟောပြော ပို့ချခဲ့ပါသည်။ စစ်ကိုင်း တိုင်းဒေသကြီး အတွင်းရှိ ကသာခရိုင်နှင့် ရွှေဘိုခရိုင်များအတွင်း ကြံသီးနှံများ ဧကပမာဏ များပြားစွာ စိုက်ပျိုးထွက်ရှိ သည့်အတွက် ထွက်ရှိလာသည့် ကုန်ချောများ တင်ပို့ရာတွင် တရားဝင်ပုံမှန် ကုန်သွယ်မှု လမ်းကြောင်းပေါ်မှ ကုန် သွယ် နိုင်ကြရန်ဆောင် ရွက်ရမည့် အချက်များ၊ နိုင်ငံတော်၏ စီးပွားရေး ဦးတည်ချက်၊ ကုန်သွယ်မှု မူဝါဒ၊ ပို့ကုန် /သွင်း ကုန် အခြေ ခံမူ၊ ပုံမှန်ကုန်သွယ်ရေးနှင့် နယ်စပ် ကုန်သွယ်ရေး လုပ်ငန်းစဉ်များ အကြောင်း၊ အမှန်အကန်တောင် သူများ အား အသုံးချလျက် တရားမဝင် ကုန်သွယ်မှုပြုလိုသူ များကြောင့် ဒုက္ခမ ရောက်စေရေးအတွက် တာဝန်ဖြင့် စစ်ဆေးရာတွင် ကြုံတွေ့ခဲ့ရသည့် အတွေ့အကြုံများ၊ ကြံစိုက်တောင် သူများလို အပ်သည့်မျိုး၊ မြေဩဇာ၊ စိုက်ပျိုးရေး လုပ်ငန်း သုံးဆေး မျိုးစုံနှင့် စက်ပစ္စည်း ကိရိယာများ ဝယ်ယူ တင်သွင်းလိုပါက ဆက်သွယ်ဆောင် ရွက်ရမည့် အချက်အလက် များကို အသေးစိတ် အကျယ်တဝင့် ဟောပြောပို့ချခဲ့ပါသည်။ ယင်းနောက် တစ်ဦးချင်း ကုန်သွယ်မှု လုပ်ငန်းရှင် မှတ်ပုံတင် လက်မှတ်အ ကြာင်း ရှင်းလင်း ပြောကြားပြီး သင်တန်း သားများ သိရှိလို သည်များ ပြန်လည်ဖြေကြား ခဲ့ပါသည်။
စစ်ကိုင်းတိုင်းဒေသကြီး၊ ကသာခရိုင်၊ ထီးချိုင့်မြို့နယ်မှ ကြံစိုက်ပျိုး ထုတ်လုပ်သည့် တောင်သူတစ်ဦးမှ စားသုံးသူ အကာအကွယ် ပေးရေး လုပ်ငန်းစဉ်များ အကြောင်းဆွေးနွေး ရာတွင် မိမိတို့ ရပ်ရွာအတွင်း စားသောက် ကုန်စည်များကြောင့် စားသုံးသူပြည်သူများ အန္တရာယ် မျိုးစုံနှင့်ကြုံတွေ့နေရသည်မှာ သိသာထင်ရှား လာပြီဖြစ်ကြောင်း၊ မိမိတို့ ကျေးရွာသူ ကျေးရွာသားများ အနေဖြင့် အဖွဲ့ကလေးများ ဖွဲ့စည်းပြီး အန္တရာယ်ရှိ စားသောက်ကုန်များ အကြောင်းကို ဟောပြော ရှင်းလင်း လိုပါကြောင်း၊ နိုင်ငံတော်၏ ဌာနဆိုင်ရာ အဖွဲ့အစည်း တစ်ရပ်မှ ယခုလို ဆောင်ရွက်ချက်များ ပြုလုပ်နေသည်ကို သိရှိရ၍ ဝမ်းမြောက်ဝမ်း သာဖြစ်ရပါကြောင်း၊ မိမိတို့ဒေသသို့လည်း လာရောက်ဟောပြော ပညာပေးစေ လိုပါကြောင်းနှင့်ကုန် ပစ္စည်းများကို ပညာပေး ဆွေးနွေးမှုသာမက စစ်ဆေး အရေးယူမှုများ ပြုလုပ်သင့်ပြီဖြစ်ပါကြောင်း အကြံပြုဆွေးနွေး ခဲ့ပါသည်။
အဆိုပါ သင်တန်းအား ၂၀၁၄ ခုနှစ်၊ နိုဝင်ဘာလ ၂၅ ရက်နေ့မှ ၂၇ ရက်နေ့အထိ (၃) ရက် တိုင်တိုင် ကျင်းပပြုလုပ်ခဲ့ရာ စစ်ကိုင်းတိုင်းဒေသကြီး ကုန်သွယ်မှုမြှင့်တင်ရေး ဦးစီးဌာနမှ ညွှန်ကြားရေးမှူး ဦးအောင်မောင်းနှင့် ကသာခရိုင်အတွင်းရှိ ဌာန ဆိုင်ရာအကြီးအကဲများ တက်ရောက်ချီးမြှင့် ခဲ့ပြီး ကသာခရိုင် နှင့် ရွှေဘိုခရိုင်များ အတွင်းရှိ ကြံသီးနှံ စိုက်ပျိုးထုတ်လုပ်သူ များနှင့် ပြောင်း/နှမ်းသီးနှံ စိုက်ပျိုး ထုတ်လုပ်သူများ၊ စိတ်ပါဝင်စားသူ ဝန်ထမ်းများ စုစုပေါင်း သင်တန်းသား (၆၉)ဦး တက်ရောက် ခဲ့ကြပါသည်။
သိန်းစိုးသစ် (စစ်ကိုင်း)
