Department of Trade

စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ ကူးသန်းရောင်းဝယ်ရေးနှင့် စားသုံးသူရေးရာ ဦးစီးဌာနမှ ဝန်ထမ်းများသည် တိုင်းဒေသကြီးအစိုးရအဖွဲ့ ဦးဆောင်မှုဖြင့် တိုင်းဒေသကြီးအတွင်းရှိကျောင်း များ၊ဈေးများတွင် အပတ်စဉ် စားသုံးသူ အကာအကွယ်ပေးရေး ဆိုင်ရာ အသိပညာ ပေးဟော ပြောပွဲများ ကျင်းပလျက်ရှိရာ၂၀၁၄ ခုနှစ် ဒီဇင်ဘာလ ၁ ရက်နေ့ နံနက် ဝ၉ း ၃၀တွင် မကွေးမြို့မြို့ဦးရပ် အမှတ် (၂) အထက်တန်းကျောင်းရှိ ကံကော်ခန်းမတွင် စားသုံးသူ အကာအကွယ်ပေးရေး ဆိုင်ရာပညာ ပေးဟောပြောပွဲ ကျင်းပခဲ့သည်ဟု သတင်းရရှိ ပါသည်။

အဆိုပါ ဟောပြောပွဲသို့ လက်ထောက်ကျောင်းအုပ်ကြီးနှင့် တကွ ဆရာ/ဆရာမ စုစုပေါင်း (၃၅) ဦး၊ ကျောင်းသား/ကျောင်းသူ (၅၀၂) ဦး၊ ကျောင်းမုန့်ဈေးတန်းမှ ဈေးသည် (၅)ဦး၊ စားသုံးသူအကာအကွယ်ပေးရေးဌာနမှ ဝန်ထမ်း (၅) ဦးတက်ရောက်ခဲ့ကြပြီး စားသုံးသူ အကာအကွယ်ပေးရေးဆိုင်ရာ အသိပညာပေး စာစောင်များ၊ ပိုစတာများဖြန့်ဝေပေးခဲ့ပါသည်။

အဆိုပါစားသုံးသူ အကာအကွယ်ပေးရေးဆိုင်ရာ ဆွေးနွေးပွဲတွင် တိုင်းဒေသကြီးဦးစီးမှူး ဦးဝမ်းမောင်မှ အဖွင့်အမှာစကားပြောကြားပြီး မကွေးတိုင်းဒေသကြီး၊ စားသုံးသူရေးရာဌာနမှ တာဝန်ရှိသူများက စားသုံးသူအကာ အကွယ်ပေးရေးဆိုင် ရာ ဥပဒေများ၊ စီးပွားရေး လုပ်ငန်းရှင်များ၏ အခွင့်အရေးနှင့် တာဝန်များ၊ တားမြစ်ချက်များအကြောင်း၊ အစားအသောက်များတွင် သုံးစွဲလျက်ရှိသော ဓါတုဆိုးဆေး များအကြောင်း၊  ဓါတ်မြေဩဇာနှင့် ပိုးသတ်ဆေးများ၏ ကောင်းကျိုးနှင့် အဆိုး အပြစ်များအကြောင်းဆွေးနွေးတင်ပြပြီး နိဂုံးချုပ်အနေဖြင့် တိုင်းဒေသကြီးဦးစီးမှူးမှ မိမိဌာန၏ လုပ်ဆောင်လျက်ရှိသော လုပ်ငန်းဆောင်ရွက်နေသည့် အခြေအနေများ၊ စားသုံးသူအကာအကွယ် ပေးရေးဆိုင်ရာလုပ်ငန်းများ အကြောင်း၊ စားသုံး သူများ တစ်စုံတစ်ခုသော အကြောင်းအရာကြောင့် နစ်နာဆုံးရှုံးမှုများဖြစ်ပေါ်လာပါက တင်ပြတောင်းဆိုနိုင်ရန်အတွက်  မကွေးတိုင်းဒေသကြီးတွင် စားသုံးသူအငြင်းပွားမှုဖြေရှင်း ရေးအဖွဲ့ ဖွဲ့စည်းထားရှိမှုအခြေအနေ၊ ၎င်းအဖွဲ့အောက်တွင် တိုင်ကြားမှုလက်ခံရေးကော်မတီနှင့် ထုတ် ကုန်လုံခြုံစိတ်ချရမှုဆိုင်ရာလုပ်ငန်းကော်မတီအား ဖွဲ့စည်းလျက်ရှိ ကြောင်း၊ ဌာနဆိုင်ရာများမှလည်း စားသုံးသူအကာအကွယ်ပေးရေးအတွက် သက်ဆိုင်ရာကဏ္ဍအလိုက် ဝိုင်းဝန်း ပူးပေါင်း ဆောင်ရွက် လျက်ရှိသည့်အခြေအနေများ၊ စားသုံးသူအကာအကွယ်ပေးရေးဥပဒေတွင် ပါဝင်သည့် ရည်ရွယ်ချက် နှင့် စားသုံးသူများ၏ အခွင့်အရေးနှင့် တာဝန်များအကြောင်းကို နိဂုံးချုပ် ဟောပြောခဲ့ပါသည်။

ထို့နောက် တိုင်းဒေသကြီးဦးစီးမှူးနှင့် ကျောင်းအုပ်ဆရာမကြီးတို့ ဦးဆောင်၍ မုန့်ရောင်းချ လျက်ရှိသော ကျောင်းမုန့်ဈေးဆိုင်များသို့ သွားရောက်ကာ မုန့်ရောင်းချမှုအခြေအနေများနှင့် သန့်ရှင်း လတ်ဆက်ပြီး ဘေးဥပဒ်မဖြစ်သော အစားအစာ များကိုသာ ရောင်းချကြရန် ညွှန်ကြားခဲ့ပြီး ၎င်းကျောင်းတွင် ကျောင်းကျန်းမာရေး စစ်ဆေးလျက်ရှိသော ကျောင်းကျန်းမာရေးအဖွဲ့များကို ကူးသန်းရောင်းဝယ်ရေး ဦးစီးဌာန၏ ဆောင်ရွက်လျက်ရှိသော လုပ်ငန်းများအကြောင်းနှင့် စားသုံးသူအကာ အကွယ်ပေးရေး ဆိုင်ရာဥပဒေအကြောင်းကို ဆွေးနွေးကာ လက်ကမ်းစာစောင်များ၊ စားသုံးသူရေးရာ စာအုပ်များပေး ဝေခဲ့ပါသည်။

မကွေးတိုင်းဒေသကြီး၊ ကူးသန်းရောင်းဝယ်ရေးနှင့် စားသုံးသူရေးရာဦးစီးဌာနအနေဖြင့် ၂၀၁၄ ခုနှစ် နိုဝင်ဘာလ၂၆ ရက်နေ့တွင် နတ်မောက်မြို့နယ်တွင် လူအင်အား (၁၅၀) ဦးနှင့် မြို့သစ်မြို့နယ်တွင် (၂၄၂) ဦး၊ ဒီဇင်ဘာလ ၁ ရက်နေ့တွင် ပွင့်ဖြူမြို့နယ်၊ လယ်ကိုင်းကျေးရွာအုပ်စု မူလတန်းကျောင်း တွင်ဆရာ/ဆရာမ၊ ကျောင်းသူ/ကျောင်းသား (၁၃၄) ဦးအားလည်းကောင်း၊ ဒီဇင်ဘာလ၂ ရက်နေ့ တွင် မင်းဘူးမြို့နယ်၊ စကုမြို့တွင်  အခြေခံမူလတန်းကျောင်း၌ လူအင်အား (၁၄၀) ဦး အားလည်း ကောင်း၊ စားသုံးသူအကာအကွယ်ပေးရေးဆိုင်ရာ လက်ကမ်းစာစောင်များ၊ ပိုစတာများဖြန့်ဝေ ပေးခြင်း နှင့် ဆွေးနွေးဟောပြောပွဲများ ကျင်းပခဲ့ကြောင်း သတင်းရရှိပါ သည်။      

                                                                             (WM)စားသုံးသူရေးရာဌာန၊ မကွေး

             နိုင်ငံအတွင်း နေထိုင်လျက်ရှိသည့် စားသုံးသူပြည်သူများ ကုန်စည်နှင့် ဝန်ဆောင်မှုများကို ဘေးဥပဒ် အန္တရာယ်ကင်းစွာဖြင့် ဝယ်ယူအသုံးပြုနိုင်ရန်အတွက် နိုင်ငံတော်မှ စားသုံးသူအကာအကွယ်ပေးရေး ဥပဒေကို ပြဌာန်းခဲ့သဖြင့် ဥပဒေ၏ ရည်ရွယ်ချက်များ အောင်မြင်စွာ အကောင်အထည်ဖော်ရန်၊ စားသုံးသူ ပြည်သူများမှ အမျိုးသားရေးစိတ်ဓါတ်ဖြင့် ဝိုင်းဝန်းပူးပေါင်းဆောင်ရွက်ရန်အတွက် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ ကူးသန်းရောင်းဝယ်ရေးနှင့် စားသုံးသူရေးရာဦးစီးဌာန၊ ရန်ကုန်တိုင်းဒေသကြီး ဦးစီးမှူးရုံးမှ လက်ထောက်ညွှန်ကြားရေးမှူး ဦးမင်းသိန်းနှင့် ဝန်ထမ်းများသည် ရန်ကုန်တိုင်း ကျန်းမာရေးဦးစီးဌာနနှင့် ပူးပေါင်း၍ ၂၀၁၄ခုနှစ်၊ နိုဝင်ဘာလ၂၈ ရက်၊ နံနက် ၁၀း၃၀ နာရီတွင် ရန်ကုန်တိုင်းဒေသကြီး၊ သုံးခွမြို့နယ် အမှတ် (၁) အခြေခံပညာအထက်တန်းကျောင်း၊ ခန်းမဆောင်၌ စားသုံးသူအကာအကွယ်ပေးရေးအကြောင်း သိကောင်းစရာများ ဟောပြောဆွေးနွေးပွဲ ကျင်းပခဲ့ပါသည်။

          ဟောပြောဆွေးနွေးပွဲတွင် ရန်ကုန်တိုင်းဒေသကြီး ဦးစီးမှူးရုံး၊ လက်ထောက်ညွှန်ကြားရေးမှူး ဦးမင်းသိန်းက ဟောပြောဆွေးနွေးရာ၌ ပြည်သူများ ဘေးဥပဒ်အန္တရာယ်ကင်းရှင်းစွာဖြင့် အစားအသောက် နှင့်ဆေးဝါးများကို ဝယ်ယူသုံးစွဲနိုင်ရန် နိုင်ငံတော်မှ အမျိုးသားအစားအသောက်ဥပဒေ၊ အမျိုးသားဆေးဝါး ဥပဒေနှင့် တိုင်းရင်းဆေးဝါးဥပဒေတို့ကို ပြဌာန်းခဲ့ပြီးဖြစ်ကြောင်း၊ ယခုအခါ အစားအသောက်သာမက ကုန်စည်နှင့် ဝန်ဆောင်မှုများနှင့်ပတ်သက်၍ စားသုံးသူများကို အကာအကွယ်ပေးနိုင်ရန်၂၀၁၄ခုနှစ်၊ မတ်လ (၁၄) ရက်နေ့ တွင်၂၀၁၄ခုနှစ်၊ ပြည်ထောင်စုလွှတ်တော် ဥပဒေအမှတ် ၁၀ ဖြင့် စားသုံးသူအကာအကွယ်ပေးရေးဥပဒေကို ပြဌာန်းခဲ့သဖြင့် စားသုံးသူများကို ဥပဒေနှင့်အညီ အကာအကွယ်ပေးနိုင်မည်ဖြစ်ကြောင်းနှင့် ဥပဒေပါအချက် များကို အသေးစိတ် ရှင်းလင်းပြောကြားခဲ့ပါသည်။

          ထို့ပြင် စားသုံးသူနှင့် စီးပွားရေးလုပ်ငန်းရှင်အကြား အငြင်းပွားမှုကို ဖြေရှင်းဆောင်ရွက်ပေးရန် ၂၀၁၄ ခုနှစ်၊ အောက်တိုဘာလ ၂၀ ရက်နေ့တွင် ရန်ကုန်တိုင်းဒေသကြီး စားသုံးသူအငြင်းပွားမှုဖြေရှင်းရေးအဖွဲ့ကို ဖွဲ့စည်းခဲ့ပြီးဖြစ်၍ စားသုံးသူများ၏ နစ်နာမှုများကို ဖြေရှင်းဆောင်ရွက်နိုင်မည်ဖြစ်ပြီး မိမိတို့ဦးစီးဌာန အနေဖြင့်လည်း စားသုံးသူကာကွယ်ရေးလုပ်ငန်းများကို ဆောင်ရွက်သည့်အနေဖြင့် ပြည်ပမှတင်သွင်းမည့် ကုန်ပစ္စည်းများကို သတ်မှတ်စံချိန်စံညွှန်း၊ အရည်အသွေးပြည့်မီမှသာ ခွင့်ပြုလိုင်စင်ထုတ်ပေးခြင်း၊ ပြည်ပမှ တရားမဝင် ဝင်ရောက်လာသည့် စားသောက်ကုန်ပစ္စည်းများ၊ ဆေးဝါးများကို သိမ်းဆည်း၍ မီးရှို့ဖျက်ဆီးမှုများက ဆောင်ရွက်လျက်ရှိကြောင်း၊ ဥပဒေတွင်ပါရှိသည့် စားသုံးသူ၏ အခွင့်အရေးနှင့်တာဝန်၊ စီးပွားရေးလုပ်ငန်းရှင်၏ အခွင့်အရေးနှင့်တာဝန်၊ တားမြစ်ချက်များနှင့် အဆိုပါတားမြစ်ချက်များကို ဖေါက်ဖျက်ကျူးလွန်လျှင် ချမှတ်ခံရမည့် ပြစ်မှု၊ ပြစ်ဒဏ်များအကြောင်းကို အသေးစိတ်ရှင်းလင်း ဆွေးနွေးပြောကြားခဲ့ပါသည်။

          ဆက်လက်၍ တိုင်းကျန်းမာရေးဦးစီးဌာနကိုယ်စား သုံးခွမြို့နယ် ကျန်းမာရေးဌာန၊ ဆေးရုံအုပ်ကြီး ဒေါက်တာဦးစိုးဝင်းမှ စားသုံးသူများအနေဖြင့် (FDA) ထောက်ခံချက်ပါရှိသည့် အစားအသောက်နှင့် ဆေးဝါးများကို ရွေးချယ်စားသုံးရန်နှင့် စားသုံးသူအကာအကွယ်ပေးရေး ဥပဒေပြဌာန်းချက်များကို တစ်ဆင့်စကား တစ်ဆင့် ပြောကြားပေးရန်လိုကြောင်း တိုက်တွန်းဟောပြောဆွေးနွေးခဲ့ပါသည်။

          အဆိုပါဟောပြောဆွေးနွေးပွဲသို့ တိုင်းဒေသကြီးဦးစီးမှူးရုံးမှ အရာထမ်း/အမှုထမ်းများ၊ မြို့နယ် ကျန်းမာရေးဌာနမှ ဆေးရုံအုပ်ကြီး၊ သုံးခွမြို့နယ် အထွေထွေအုပ်ချုပ်ရေးဦးစီးမှူးနှင့် ဝန်ထမ်းများ၊ ဌာန ဆိုင်ရာများမှ တာဝန်ရှိသူများ၊ မြို့နယ်လက်ထောက်ပညာရေးမှူး၊ အထက်တန်းကျောင်း (၁၅) ကျောင်း၊ အလယ်တန်းကျောင်း (၂၆) ကျောင်း၊ မူလတန်းကျောင်း (၁၀၄) ကျောင်းတို့မှ ကျောင်းအုပ်ဆရာကြီး/ ဆရာမကြီးများနှင့် ကျောင်းကိုယ်စားလှယ် (၁၄၆) ဦး၊ မြို့နယ်စစ်မှုထမ်းဟောင်းအဖွဲ့၊ မြို့နယ်ကြက်ခြေနီတပ်ဖွဲ့၊ မြို့နယ်မိခင်နှင့် ကလေးစောင့်ရှောက်ရေး အသင်းဝင်များ၊ မြို့နယ်/ ရပ်ကွက်/ ကျေးရွာ/ အုပ်ချုပ်ရေးမှူးများနှင့် အထောက်အကူပြု အဖွဲ့ဝင်များ၊ စုစုပေါင်း (၂၇၀) ဦးခန့်တက်ရောက်ပြီး လက်ကမ်းစာစောင်များ ဖြန့်ဝေ ပေးခဲ့ကြောင်း သတင်းရရှိပါသည်။

                                                                   ကိုကိုမောင်(စားသုံးသူ)ရန်ကုန်

၂၀၁၄ ခုနှစ် ဒီဇင်ဘာလ (၈) ရက်နေ့မှ (၉) ရက်နေ့အတွင်း ဗီယက်နမ်နိုင်ငံ၊ ဟနွိုင်းမြို့တွင်ပထမ အကြိမ် အာဆီယံစားသုံးသူ ကာကွယ်ရေး ညီလာခံကို ကျင်းပပြုလုပ်ခဲ့ပါသည်။ အဆိုပါ ညီလာခံအား ဗီယက်နမ် ယှဉ်ပြိုင်မှု အာဏာပိုင်အဖွဲ့အ စည်းမှ အိမ်ရှင်နိုင်ငံအဖြစ် လက်ခံကျင်းပ ခဲ့ခြင်းဖြစ်ပြီး အာဆီယံ-ဩစတြေးလျဖွံ့ဖြိုးတိုးတက်မှု ပူးပေါင်းဆောင်ရွက်ရေး အစီအစဉ် အဆင့်(၂)၏ အထောက် အပံ့ဖြင့် ၎င်းအဖွဲ့အစည်း၏ စားသုံးသူကာကွယ်ရေး ဆိုင်ရာ သုတေသနနှင့် ေ ဆွးနွေးမှု အထောက် အပံ့ပြုရေး စီမံကိန်းအောက်တွင် ကျင်းပခဲ့ခြင်းဖြစ်ပါသည်။

ညီလာခံသို့ အာဆီယံ စားသုံးသူကာကွယ်ရေး ကော်မတီအဖွဲ့ဝင်နိုင်ငံများမှ ကိုယ်စားလှယ်များ၊ အခြားမိတ်ဖက်အဖွဲ့အစည်းများမှ ကိုယ်စားလှယ်များ၊ အာဆီယံ- ဩစတြေးလျ ဖွံ့ဖြိုးတိုးတက်မှု ပူးပေါင်း ဆောင်ရွက်ရေး အစီအစဉ်အဆင့် (၂) မှ ကိုယ်စားလှယ်များ၊ နိုင်ငံတကာ အဖွဲ့အစည်းများမှ ကိုယ်စားလှယ်များ၊ အစိုးရ မဟုတ်သောအဖွဲ့အစည်းများမှ ကိုယ်စားလှယ်များ၊ ပုဂ္ဂလိကကဏ္ဍမှ ကိုယ်စားလှယ်များ၊ သုတေသန ပညာရှင်များတက်ရောက်ခဲ့ ကြပါသည်။ မြန်မာနိုင်ငံမှ စီးပွားေ ရးနှင့် ကူးသန်းရောင်းဝယ်ရေးဝန်ကြီးဌာနမှ ကိုယ်စားလှယ် (၃) ဦးတက်ရောက်ခဲ့ကြပါသည်။

ညီလာခံတွင် စားသုံးသူ ကာကွယ်ရေးဆိုင်ရာ မူဝါဒအနှစ်ချုပ်စာအုပ်များနှင့်CaseStudies များကို Sessions များခွဲခြား၍ ခေါင်းစဉ်အလိုက် ဆွေးနွေးခဲ့ပါသည်။ ဆွေးနွေးခဲ့သော အကြောင်းအရာများမှာ အဓိကအားဖြင့် အာဆီယံနိုင်ငံများတွင် ကြုံတွေ့နေရသော စားသုံးသူကာကွယ်ရေး ဆိုင်ရာစိန်ခေါ်မှုများ၊ ရွေ့လျားနေသော ငွေကြေးဝန်ဆောင်မှုလုပ်ငန်းများ၊ စားသုံးသူထုတ်ကုန်လုံခြုံ စိတ်ချရမှု လုပ်ငန်းမျာ၊ E-Commerce ကဏ္ဍတွင် စားသုံးသူ အကာအကွယ်ပေးမှု၊ စားသုံးသူ အရေးယူဆောင် ရွက်မှုလုပ်ငန်းများ၊ ဖွံ့ဖြိုးဆဲနိုင်ငံများတွင် စားသုံးသူ ကာကွယ်ရေးဆိုင်ရာ ဥပဒေပြဌာန်းမှုနှင့် အဖွဲ့ အစည်းများဖွဲ့စည်းဆောင်ရွက်မှုများ၊ ၂၀၁၅ ခုနှစ်အလွန် စားသုံးသူကာကွယ်ရေး ဆိုင်ရာဆောင်ရွက်သွား မည့်လုပ်ငန်းများ ကို ဆွေးနွေးခဲ့ပါသည်။

မြန်မာနိုင်ငံအနေဖြင့် စားသုံးသူ အကာအကွယ်ပေးရေး ဥပဒေပြဌာန်းထားရှိမှု၊ စားသုံးသူကာကွယ်ရေး ဆိုင်ရာ ဆက်စပ်ဥပဒေများပြဌာန်းထားရှိမှု၊ စားသုံးသူ အကာအကွယ်ပေးရေးလုပ်ငန်း အားသက်ဆိုင် ရာဝန်ကြီး ဌာနများနှင့်အကောင်အ ထည်ဖော်ဆောင်ရွက်လျက်ရှိမှု၊ စားသုံးသူအကာ ကွယ်ပေးရေး လုပ်ငန်းများအတွက် တွေ့ကြုံနေရသည့် စိန်ခေါ်မှုများနှင့် ဖြေရှင်းဆောင်ရွက်မှု အခြေအနေ၊ အနာဂတ်ကာတွင် ဆောင်ရွက်သွားမည့် စားသုံးသူ အကာအကွယ်ပေးရေးလုပ်ငန်း များ နှင့် ဒေသဆိုင်ရာ အဖွဲ့အစည်းများ၊ နိုင်ငံတကာအဖွဲ့အစည်းများနှင့် ပူးပေါင်းဆောင်ရွက်သွားမည့် အခြေအနေတို့ကို ဆွေးနွေးခဲ့ပါသည်။

                                                                                      မျိုးမျိုးထိုက် (စားသုံးသူရေးရာ)

မြန်မာ-ထိုင်းနယ်စပ်ရှိ မြိတ်နယ်စပ် ကုန်သွယ်ရေးစခန်းက နိုဝင်ဘာလ ၂၉ ရက်မှ ဒီဇင်ဘာလ ၅ ရက် နေ့အတွင်း ကန်ဒေါ်လာဝ ဒသမ ၄၀၃ သန်းတန်ဖိုးရှိ ကဏန်းသေး (သေ) ၂ တန်ကျော်၊ သဲကဏန်း  ၁တန်ကျော်၊ ကဏန်းပျော့၂၁ တန်ကျော်၊ ကဏန်းနီ  တန် ၆၀ တင်ပို့နိုင်ခဲ့ပါတယ်။ ယခင်သီတင်း ပတ်တွင် သဲကဏန်းတစ်မျိုးတည်း  ၁ တန်နီးပါးသာ တင်ပို့နိုင်ခဲ့တဲ့အတွက် ယခင်သီတင်းပတ်ထက် ကဏန်းတင်ပို့မှုများမှာ  ၈၃ တန်ကျော်ပိုမိုတင်ပို့နိုင်ခဲ့ပါတယ်။ မြိတ်နယ်စပ် ကုန်သွယ်ရေး စခန်းအနေနဲ့  ယခုအပတ်အတွင်း ကဏန်းမျိုးစုံ အပြင် ကန်ဒေါ်လာ ၁ ဒသမ  ၅၅၃ သန်းတန်ဖိုးရှိ  ငါးမျိုးစုံ ၁၀၂၅ တန်ကျော်၊ ရေငန်ပုစွန် ၁၅ တန်ကျော်၊  ကင်းမွန်  ၅၆ တန်နီးပါး၊ ငါးမှုန့်တန် ၃၆၀၊ ပုစွန်ခြောက် ၂ တန်ကျော်၊ ငါးအသားလွှာ ၂၄ တန်နဲ့ကင်းမွန်ခြောက်  ၃ တန်နီးပါး တင်ပို့နိုင်ခဲ့ပါတယ်။

                                                                                 ခင်မြနွယ် (DCCA)

စားသုံးသူ အကာအကွယ်ပေးရေးနဲ့ တရားမဝင် ကုန်သွယ်မှု တားဆီးထိန်းချုပ်ရေး လုပ်ငန်းများအား  စစ်တောင်းတံတားဟောင်းနဲ့ အသစ်လမ်းဆုံရှိ ညောင်ခါးရှည်မှာ အခြေပြု၍ တာဝန်ထမ်းဆောင် နေသောMobile Team လရ-၂ အဖွဲ့ဟာ ဒီဇင်ဘာလ ၄ ရက်နေ့ ၂၂း၀၀ ချိန်မှာ မြဝတီမှလာတဲ့ ံHino Truckယာဉ်အမှတ်3I/xxxx အား စစ်ဆေးစဉ် တရားမဝင် အကောက်ခွန်မဲ့ပစ္စည်း ခန့်မှန်းတန်ဖိုးကျပ် ၅၄၁ ဒသမ ၅၆၀ သိန်းအား ရှာဖွေတွေ့ရှိခဲ့ပါတယ်။ ရှာဖွေတွေ့ရှိခဲ့သော အကောက်ခွန်မဲ့ပစ္စည်းများ တင်ဆောင်တဲ့ Hino Truck  ယာဉ် ခန့်မှန်းတန်ဖိုးကျပ်သိန်း ၄၀၀ နဲ့ သိမ်းဆည်းရမိ အကောက်ခွန်မဲ့ ပစ္စည်းများအား အကောက်ခွန်လုပ်ထုံးလုပ်နည်း နဲ့အညီ အမှုတွဲဖွင့် ထိန်းသိမ်းထားတယ်လို့ သတင်းရရှိပါတယ်။ သိမ်းဆည်းရမိ ပစ္စည်းများမှာEpson Brand နဲ့ Canon Brand Printers ၁၅၀ လုံး၊Electric Pan ၇၅၄ လုံး ၊ ထမင်းပေါင်းအိုး (အကြီး၊ အသေး) ၇၃၂ လုံး၊ ဓါတ်ဘူးများ၊ လျှပ်စစ်မီးပူများ၊Speaker (8'' ၊ 12'') များနဲ့ ဆက်စပ်ပစ္စည်းများ၊  Receiver အသေး ၊Audio Wire တို့ဖြစ်ကြပါတယ်။

                                                                                                DCCA  DCCA