Department of Trade

            မြန်မာနိုင်ငံယှဉ်ပြိုင်မှုကော်မရှင်ထံ တိုင်ကြားလာသည့် ယှဉ်ပြိုင်မှုဆိုင်ရာအမှုကိစ္စများနှင့်စပ်လျဉ်းသည့် အစည်းအဝေးအား ၂၀၂၂ ခုနှစ်၊ မေလ ၃၁ ရက်နေ့ (အင်္ဂါနေ့)၊ နံနက် (၁၀:၀၀) နာရီချိန်တွင် Virtual စနစ်ဖြင့် ကျင်းပပြုလုပ်ခဲ့ရာ ကော်မရှင်အဖွဲ့ဝင် (၁၁)ဦးနှင့် ကော်မရှင်ရုံးအဖွဲ့မှ တာဝန်ရှိသူများ၊ စုစုပေါင်း (၁၅)ဦး ပါဝင်တက်ရောက်ခဲ့ပြီး  မြန်မာနိုင်ငံယှဉ်ပြိုင်မှုကော်မရှင် ဒုတိယဥက္ကဋ္ဌ ဦးသန်းမောင်က အဖွင့်အမှာစကားပြောကြားခဲ့ပါသည်။

            အစည်းအဝေးတွင် ကော်မရှင် ဒုတိယဥက္ကဋ္ဌက အဖွင့်အမှာစကား ပြောကြားရာ၌ မြန်မာနိုင်ငံယှဉ်ပြိုင်မှုကော်မရှင်သည် ဥပဒေအရဖွဲ့စည်းထားသည့် ကော်မရှင်ဖြစ်သည့်အတွက် ကော်မရှင်၏ လုပ်ငန်းဆောင်ရွက်ချက်များကို ဥပဒေ၊ နည်းဥပဒေပါပြဌာန်းချက်များနှင့်အညီ လိုက်နာအကောင်အထည်ဖော် ဆောင်ရွက်သွားရန်ဖြစ်ကြောင်း၊ ကော်မရှင်အနေဖြင့် လုပ်ငန်းနယ်ပယ်အသီးအသီးတွင် လွတ်လပ်မျှတသော ယှဉ်ပြိုင်မှုဖြစ်ထွန်းပေါ်ပေါက်စေရေးနှင့် အများပြည်သူအကျိုးစီးပွား ထိခိုက်နစ်နာစေခြင်းမှ ကာကွယ်နိုင်ရေးတို့အတွက် အထူးအလေးထား ဆောင်ရွက်လျက်ရှိသကဲ့သို့ ယှဉ်ပြိုင်မှုမူဝါဒများနှင့်အညီ အကောင်အထည်ဖော်ဆောင်ရွက်နိုင်ရေးအတွက် နိုင်ငံတကာတွင်လည်း အာဆီယံကဲ့သို့သော ဒေသတွင်းအဖွဲ့အစည်းများနှင့် ပူးပေါင်း ဆောင်ရွက်လျက်ရှိပါကြောင်း၊ တိုင်ကြားလာသည့်အမှုကိစ္စများအား ကိုင်တွယ်ဖြေရှင်းရာတွင် ကော်မရှင်အဖွဲ့ဝင်များသည် မတူညီသော အတွေ့အကြုံ၊ ကျွမ်းကျင်မှု နယ်ပယ်အသီးသီးမှ ပုဂ္ဂိုလ်များဖြစ်သည့်အားလျော်စွာ မိမိတို့၏ သက်ဆိုင်ရာ ကျွမ်းကျင်မှုနယ်ပယ်များအလိုက် ဝိုင်းဝန်းအကြံပြု ဆွေးနွေးပေးစေလိုပါကြောင်း ပြောကြားခဲ့ပါသည်။ 

            အစည်းအဝေးကို ဆက်လက်ကျင်းပရာ တိုင်ကြားလာသောအမှုကိစ္စများအလိုက် တိုင်ကြားလာမှုအခြေအနေများ၊ တိုင်ကြားစာများပါအကြောင်းအရာများ၊ တိုင်ကြားစာများအပေါ် ကော်မရှင်အဖွဲ့ဝင်များ၏ သဘောထားအကြံပြုချက်များ၊ ရုံးအဖွဲ့၏ စိစစ်သုံးသပ်ချက်များနှင့် ကော်မရှင်အနေဖြင့် ဆက်လက်ဆောင်ရွက်သွားသင့်သည့် လုပ်ငန်းစဉ်များနှင့် စပ်လျဉ်း၍ ရုံးအဖွဲ့၏ ညွှန်ကြားရေးမှူးက ရှင်းလင်းတင်ပြဆွေးနွေးခဲ့ပါသည်။ တိုင်ကြားလာသောအမှုကိစ္စများအလိုက် သုံးသပ်တွေ့ရှိချက်များ၊ သဘောထားအမြင်များ၊ အကြံပြုချက်များကို ကော်မရှင်အဖွဲ့ဝင်များက ဝိုင်းဝန်းဆွေးနွေးခဲ့ကြပြီး အစည်းအဝေးကို (၁၂:၁၅) နာရီချိန်တွင် ရုပ်သိမ်းခဲ့ပါသည်။

မြန်မာနိုင်ငံယှဉ်ပြိုင်မှုကော်မရှင် (၁/၂၀၂၂) ပုံမှန်အစည်းအဝေးကို ၂၀၂၂ ခုနှစ်၊ ဖေဖော်ဝါရီလ (၃) ရက်နေ့ နံနက် (၁၀:၀၀) နာရီချိန်တွင် နေပြည်တော်၊ ရုံးအမှတ် (၃)၊ စီးပွားရေး နှင့် ကူးသန်းရောင်းဝယ်ရေးဝန်ကြီးဌာန၊ အစည်းအဝေးခန်းမ၌ ကျင်းပပြုလုပ်ခဲ့ရာ မြန်မာနိုင်ငံယှဉ်ပြိုင်မှုကော်မရှင် ဥက္ကဌ၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး  ဒေါက်တာပွင့်ဆန်း တက်ရောက် အမှာစကားပြောကြားခဲ့ပါသည်။

            အစည်းအဝေးတွင် ကော်မရှင်ဥက္ကဋ္ဌ၊ ပြည်ထောင်စုဝန်ကြီးက အဖွင့်အမှာစကား ပြောကြားရာ၌ နိုင်ငံ့စီးပွားရေး ခိုင်မာတောင့်တင်းစေရေးနှင့် ရေရှည်ဖွံ့ဖြိုးတိုးတက်ရေးတို့အတွက် ဥပဒေများ ခိုင်မာအားကောင်းရန် လိုအပ်ပါကြောင်း၊ ဥပဒေကို စတင်ရေးဆွဲခဲ့သည့်အချိန်နှင့် လက်ရှိအချိန်တို့အကြား ပကတိအခြေအနေနှင့် လိုက်လျောညီထွေဖြစ်စေရေးအတွက် စဉ်းစားဆောင်ရွက်ရမှာဖြစ်ပြီး အားလုံးဝိုင်းဝန်းပူးပေါင်းဆောင်ရွက်ပါက ကုန်သွယ်မှုနှင့် ရင်းနှီးမြှုပ်နှံမှု ဖွံ့ဖြိုးတိုးတက်ရေးအတွက် များစွာအထောက်အကူပြုမှာဖြစ်ကြောင်း၊ ယခုအခါ အာဆီယံအဖွဲ့ဝင်နိုင်ငံတိုင်းတွင် ယှဉ်ပြိုင်မှုဥပဒေများကိုရေးဆွဲပြဌာန်းပြီး အကောင်အထည်ဖော်ဆောင်ရွက်လျက်ရှိရာ အာဆီယံအဖွဲ့ဝင်နိုင်ငံများ၏ ယှဉ်ပြိုင်မှုအာဏာပိုင် အဖွဲ့အစည်းများနှင့် ပူးပေါင်းဆောင်ရွက်လျက်ရှိပါကြောင်း၊ အာဆီယံအဖွဲ့ဝင်နိုင်ငံများ၏  ယှဉ်ပြိုင်မှုဥပဒေများအကြား မတူကွဲပြားမှုများ၊ တူညီမှုအခြေအနေများကို လေ့လာကြည့်ရှုပြီး မိမိတို့ကော်မရှင်အနေဖြင့်  ကြုံတွေ့ခဲ့သော အတွေ့အကြုံများမှတစ်ဆင့် ရှေ့ဆက် ဆောင်ရွက်သွားသင့်သည့် လုပ်ငန်းအစီအစဉ်များကိုလည်း ဝိုင်းဝန်းအကြံပြု ဆွေးနွေးပေးစေလိုပါကြောင်း ပြောကြားပါသည်။

            အစည်းအဝေးကို ဆက်လက်ကျင်းပရာ ယခင် (၁/၂၀၂၁) ပုံမှန် အစည်းအဝေး ဆုံးဖြတ်ချက်များအပေါ် ဆောင်ရွက်ပြီးစီးမှုအခြေအနေများ၊ ၂၀၂၁ ခုနှစ်အတွင်း ကော်မရှင်၏ လုပ်ငန်းဆောင်ရွက်မှုအခြေအနေများ၊ အာဆီယံဒေသတွင်းနိုင်ငံများရှိ ယှဉ်ပြိုင်မှုအာဏာပိုင်အဖွဲ့အစည်းများနှင့် ပူးပေါင်းဆောင်ရွက်နေမှုအခြေအနေများ၊ ကော်မရှင်က ဆက်လက်ဆောင်ရွက်မည့် လုပ်ငန်းအစီအစဉ်များနှင့်စပ်လျဉ်း၍ ကော်မရှင်ရုံး တာဝန်ရှိသူများက ရှင်းလင်းတင်ပြ ဆွေးနွေးခဲ့ပြီး ကော်မရှင်အဖွဲ့ဝင်များက ဖြည့်စွက်ဆွေးနွေးကာ အစည်းအဝေးကို (၁၂:၃၀) နာရီချိန်တွင် ရုပ်သိမ်းခဲ့ပါသည်။

            အစည်းအဝေးသို့ မြန်မာနိုင်ငံယှဉ်ပြိုင်မှုကော်မရှင် ဒုတိယဥက္ကဋ္ဌ နှင့် ကော်မရှင်အဖွဲ့ဝင် များ၊ ကော်မရှင်ရုံးမှ တာဝန်ရှိသူများ တက်ရောက်ခဲ့ကြပါသည်။

၁။            ဝန်ထမ်းများအားလုံး မိမိလုပ်ငန်းများနှင့် သက်ဆိုင်သည့်ကိစ္စရပ်များတွင် ကွန်ပျူတာကျွမ်းကျင်စွာအသုံးပြုဆောင်ရွက်နိုင်ရန်အတွက် ဝန်ကြီးဌာနမှ ကွန်ပျူတာသင်တန်းများ ဖွင့်လှစ်သင်ကြားပေးလျက်ရှိသကဲ့သို့ ယှဉ်ပြိုင်မှုမူဝါဒဌာနခွဲအနေဖြင့်လည်း မိမိတို့ဌာနတွင်းရှိ ဝန်ထမ်းများအားလုံး  ကွန်ပျူတာအခြေခံ ကျွမ်းကျင်စွာအသုံးပြုဆောင်ရွက်နိုင်ရေးအတွက် သင်တန်းပို့ချ သင်ကြားပေးသွားမည်ဖြစ်ပါသည်။

၂။       အဆိုပါ ဌာနတွင်းသင်တန်းတွင် ကွန်ပျူတာအခြေခံ ဘာသာရပ်(၇)ခုအား (၃-၅-၂၀၂၁)ရက်နေ့မှ (၂၂-၇-၂၀၂၁)ရက်နေ့အထိ ရက်သတ္တပတ်(၁၂)ပတ်ကြာ သင်ကြားပို့ချသွားမည် ဖြစ်ပါသည်။

           စားသုံးသူကာကွယ်ရေးဥပဒေနှင့် ယှဉ်ပြိုင်မှုဥပဒေများအရ ဖွဲ့စည်းထားရှိသော မြန်မာနိုင်ငံစားသုံးသူရေးရာကော်မရှင်နှင့် ယှဉ်ပြိုင်မှုကော်မရှင်တို့၏ လုပ်ငန်းဆောင်ရွက်မှု အခြေအနေများ ရှင်းလင်းတင်ပြသည့် အခမ်းအနားကို (၁၉-၃-၂၀၂၁) ရက်နေ့ နံနက် ၁၀ နာရီတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန အစည်းအဝေးခန်းမ(၁)၌ ကျင်းပခဲ့ပါသည်။

          အခမ်းအနားတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဒေါက်တာပွင့်ဆန်းက လုပ်ငန်းများဆောင်ရွက်ရာ၌ ပိုမိုအဆင်ပြေချောမွေ့စေရေးအတွက် စားသုံးသူရေးရာကော်မတီများကို တိုးချဲ့ပြင်ဆင်ဖွဲ့စည်းရန်၊ တိုင်းဒေသကြီး/ပြည်နယ် ကောင်စီများထံသို့ သွားရောက်၍ စားသုံးသူရေးရာကော်မတီ၏ လုပ်ငန်းဆောင်ရွက်မှုများကို ရှင်းလင်းဆွေးနွေးရန်၊ စားအုန်းဆီတင်သွင်းမှုကို လျှော့ချနိုင်ရေးအတွက် ပြည်တွင်းစားသုံးမှုပုံစံများကို အဓိကထားပြောင်းလဲရန်၊ ဆီစားသုံးမှုလျှော့ချရေးအတွက် နေ့စဉ်ထုတ်သတင်းစာများ၊ သတင်း မီဒီယာများမှတစ်ဆင့် အသိပညာပေးလုပ်ငန်းများကို ကျယ်ကျယ်ပြန့်ပြန့် ဆောင်ရွက်သွားရန်နှင့် ယှဉ်ပြိုင်မှုကော်မရှင်အနေဖြင့် မိတ်ဖက်အဖွဲ့အစည်းများနှင့် ပူးပေါင်းဆောင်ရွက်မှုများကို အရှိန်အဟုန်မပျက် ဆက်လက်ဆောင်ရွက်သွားရေး ကြိုးပမ်းသွားရန်တို့ကို မှာကြားခဲ့ပါသည်။

          ထို့နောက် စားသုံးသူရေးရာဦးစီးဌာနမှ စားသုံးသူကာကွယ်ရေးဥပဒေရေးဆွဲပြဌာန်းမှု၊ စားသုံးသူရေးရာကော်မရှင်နှင့် ကော်မတီများဖွဲ့စည်းထားရှိမှု၊ စားသုံးသူရေးရာဆိုင်ရာကိစ္စများ ကိုင်တွယ်ဖြေရှင်းမှုများနှင့် မြန်မာနိုင်ငံတွင် စားအုန်းဆီတင်သွင်းမှုလျှော့ချရေး ဆောင်ရွက်ထားရှိမည့် အစီအမံများအား ရှင်းလင်းတင်ပြခဲ့ပါသည်။

          ဆက်လက်၍ ကုန်သွယ်ရေးဦးစီးဌာန၊ ယှဉ်ပြိုင်မှုမူဝါဒဌာနခွဲမှ ယှဉ်ပြိုင်မှုဥပဒေ ရေးဆွဲပြဌာန်းမှု၊ မြန်မာနိုင်ငံယှဉ်ပြိုင်မှုကော်မရှင် ဖွဲ့စည်းထားရှိမှု၊ ကော်မရှင်၏လုပ်ငန်းဆောင်ရွက်နေမှု၊ ပြည်တွင်း၊ ပြည်ပ နိုင်ငံတကာအဖွဲ့အစည်းများနှင့် ပူးပေါင်းဆောင်ရွက်မှု၊ ယှဉ်ပြိုင်မှုဆိုင်ရာအမှုကိစ္စများ ကိုင်တွယ်ဖြေရှင်းမှု အခြေအနေများနှင့် ရှေ့ဆက်ဆောင်ရွက်မည့် လုပ်ငန်းစဉ်များကို ရှင်းလင်းတင်ပြရာ ပြည်ထောင်စုဝန်ကြီးက လိုအပ်သည်များကို ပေါင်းစပ်ညှိနှိုင်းဆောင်ရွက်ပေး၍ နိဂုံးချုပ်အမှာစကားပြောကြားခဲ့ပါသည်။

          အဆိုပါအစည်းအဝေးသို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီး၊ အမြဲတမ်းအတွင်းဝန်၊ ညွှန်ကြားရေးမှူးချုပ်များနှင့် တာဝန်ရှိပုဂ္ဂိုလ်များ တက်ရောက်ခဲ့ကြပါသည်။

၂၀၂၁ ခုနှစ်၊ ဖေဖော်ဝါရီလ ၄ ရက်

၁။         မြန်မာနိုင်ငံယှဉ်ပြိုင်မှုကော်မရှင်နှင့် ကော်မရှင်ရုံးမှ တာဝန်ရှိသူများအကြား ယှဉ်ပြိုင်မှု ဥပဒေပြဌာန်းချက်များအပေါ် သုံးသပ်ညှိနှိုင်းသည့် အစည်းအဝေးကို စီးပွားရေးနှင့်ကူးသန်း ရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာန၊ ယှဉ်ပြိုင်မှုမူဝါဒဌာနခွဲတွင် (၄-၂-၂၀၂၁) ရက်နေ့ နံနက် (၁၀:၀၀) နာရီအချိန်မှ (၁၂:၀၀) နာရီအချိန်ထိ  Zoom Application အသုံးပြု၍ ကျင်းပပြုလုပ်ခဲ့ပါသည်။

၂။          အစည်းအဝေးကို မြန်မာနိုင်ငံယှဉ်ပြိုင်မှုကော်မရှင် ဒုတိယဥက္ကဋ္ဌက ဦးဆောင်၍ ကျင်းပပြုလုပ်ခဲ့ပြီး ယှဉ်ပြိုင်မှုကော်မရှင်အဖွဲ့ဝင်များနှင့် ကော်မရှင်ရုံးမှ တာဝန်ရှိသူများ တက်ရောက်ဆွေးနွေးခဲ့ကြပါသည်။ အစည်းအဝေးကျင်းပရခြင်း၏ ရည်ရွယ်ချက်မှာ ယှဉ်ပြိုင်မှု ဥပဒေပြဌာန်းချက်များအပေါ် လက်တွေ့အကောင်အထည်ဖော် ဆောင်ရွက်ရာတွင် ကြုံတွေ့ နေရသည့်အခက်အခဲများကိုဖော်ထုတ်၍ ပြင်ဆင်ဖြည့်စွက်လိုသည့်အချက်များအား ဥပဒေပုဒ်မ တစ်ခုချင်းအလိုက် သုံးသပ်ဆွေးနွေးရန် ရည်ရွယ်ခြင်းဖြစ်ပါသည်။

၃။          အစည်းအဝေးတွင် မြန်မာနိုင်ငံယှဉ်ပြိုင်မှုဥပဒေနှင့်အညီ လက်ရှိဆောင်ရွက်နေသည့် အမှုကိစ္စများနှင့်စပ်လျဉ်း၍ ကြုံတွေ့နေရသည့်အခက်အခဲများနှင့် ကြုံတွေ့လာနိုင်မည့် အခက်အခဲ များကို   နိုင်ငံတကာယှဉ်ပြိုင်မှုကော်မရှင်များ၏ ပြဌာန်းချက်၊ ဆောင်ရွက်ချက်တို့နှင့် နှိုင်းယှဉ် သုံးသပ်ဆွေးနွေးခဲ့ပါသည်။