Department of Trade

သောကြာနေ့ ၁ ဖေဖော်ဝါရီလ ၂၀၁၃ 15:26 PM

နယ်စပ် ကုန်သွယ်ရေး မှတဆင့် တစ်ဖက် နိုင်ငံသို့ သစ်ခွများကို နယ်စပ် ကုန်သွယ်ရေး နည်းလမ်း အရ သွင်းကုန် လိုင်စင်နဲ့ တင်သွင်း မယ်ဆိုလျှင် သစ်တောရေးရာ ဝန်ကြီး ဌာနရဲ့ CITES ပါမစ် ရယူ ဆောင်ရွက်ရန် လို/ မလို နဲ့ လိုအပ်ပါ သစ်ခွ အမျိုးအစား အလိုက် လိုအပ်ချက် သဘောထားများ ပြန်ကြား ပေးရန် နယ်စပ် ကုန်သွယ်ရေး ဦးစီး ဌာနမှ တောင်းဆိုချက် အရ ပတ်ဝန်းကျင် ထိန်းသိမ်းရေးနဲ့သစ်တောရေးရာ ဝန်ကြီး ဌာန၊ သစ်တော ဦးစီး ဌာနမှ CITES ပါမစ် ရယူ ဆောင်ရွက်ရန် လိုအပ်ကြောင်းနဲ့ သစ်ခွ အမျိုး အစား အလိုက် လိုအပ်ချက် များကို သိရှိနိုင်ရန် အတွက် အသိပေး လိုက်ရပါတယ်။

သစ်ခွ (Orchids) များအား ပို့ကုန်၊ သွင်းကုန် ဆောင်ရွက်ခြင်းနဲ့ စပ်လျဉ်းပြီး သစ်ခွ မျိုးစိတ် အားလုံးဟာ CITES စာရင်းဝင် ဖြစ်ပြီး Appendix I နဲ့ II ရယ်လို့ ခွဲခြား ထားတာ ဖြစ်ပါတယ်။ Appendix I မှာ သစ်ခွ မျိုးစိတ် (၈)မျိုး ပါပြီး အဆိုပါ မျိုးစိတ် (၈)မျိုးမှ အပ ကျန်သစ်ခွ မျိုးစိတ် အားလုံးဟာ CITES Appendix II စာရင်းဝင် ဖြစ်ပါတယ်။

CITES Appendix I မှာပါဝင်တဲ့ သစ်ခွ မျိုးစိတ်များမှာ -

(၁) Aerangis Cillisii

(၂) Derdrobium Crucntum

(၃) Laclia Jargheana

(၄) Laclia Lobata

(၅) Paphiopedilum spp

(၆) Peristeria elata

(၇) Phragmipedium spp

(၈) Remanthera imschootiama

အဆိုပါ သစ်ခွ မျိုးစိတ် (၈)မျိုးနဲ့ ပတ်သက်တဲ့ အစိတ် အပိုင်းများ အားလုံး၊ ပျိုးပင်များ၊ တစ်ရှုး မျိုးပွား နည်းနဲ့ မျိုးပွားရန် အစိုင်အခဲ၊ အရည်များနဲ့ မျိုးမပွားနိုင်တဲ့ အစိတ် အပိုင်းများ သယ်ယူခြင်းကို ကန့်သတ် ထားပါတယ်။ ဒါပေမဲ့ သက်ဆိုင်ရာ CITES အဖွဲ့ရဲ့သဘော တူညီချက် ရရှိပါက ဓမ္မတာ နည်းနဲ့ စိုက်ပျိုး ထုတ်လုပ်မှု များကို ချွင်းချက်ဖြင့် ခွင့်ပြု ပေးနိုင်တယ်လို့ သိရပါတယ်။ Appendix II မှာတော့ Appendix I မှာ ဖော်ပြထားတဲ့ သစ်ခွ မျိုးစိတ် (၈)မျိုးမှ လွဲ၍ ကျန်သစ်ခွ မျိုးအားလုံးကို ထည့်သွင်း ထားပြီး ၎င်းသစ်ခွ မျိုးများနဲ့ ပတ်သက်တဲ့ အစိတ် အပိုင်း အားလုံးလည်း ပါဝင်တယ်လို့ သိရ ပါတယ်။

Appendix I စာရင်းဝင် သစ်ခွ မျိုးစိတ် ဖြစ်ပါက တင်ပို့မဲ့ နိုင်ငံက ထုတ်ပေးတဲ့ ပို့ကုန် ပါမစ်နဲ့ တင်သွင်းတဲ့ နိုင်ငံက ထုတ်ပေးတဲ့ သွင်းကုန် ပါမစ် နှစ်မျိုးလုံး လိုအပ်ပြီး Appendix II စာရင်းဝင် သစ်ခွ မျိုးစိတ် အားလုံး အတွက် တင်ပို့မဲ့ နိုင်ငံရဲ့ ပို့ကုန် ပါမစ် လိုအပ်တယ်လို့ သိရှိရ ပါတယ်။ သစ်ခွ မျိုးစိတ် ဆိုရာမှာ သစ်ခွပင်နဲ့ ပတ်သက်တဲ့ အစိတ် အပိုင်း အားလုံးနဲ့ အခြေ အနေ အရပ်ရပ် အားလုံး အကျုံးဝင် တယ်လို့ သိရပါတယ်။

Appendix I နဲ့ Appendix II မှာ ပါဝင်တဲ့ မျိုးစိတ်များအား ရောင်းဝယ် ဖေါက်ကားခြင်း အတွက် CITES Export/ Import Permit ထုတ်ပေးခြင်း နဲ့ ပတ်သက်တဲ့ စည်းမျဉ်း စည်းကမ်းများကို ဆက်လက် ဖော်ပြ ပေးသွား ပါမယ်။

Source: နကသ (ဦး) မူဝါဒ >>> ပန်

ကြာသပတေးနေ့ ၃၁ ဇန်နဝါရီလ ၂၀၁၃ 18:36 PM

ဝန်ထမ်းအားလုံး ကွန်ပျူတာ တတ်မြောက်ရေး အတွက် ၂၀၁၃ ခုနှစ် အတွင်း ပထမ ခြေလှမ်း နယ်စပ် ကုန်သွယ်ရေး ဦးစီးဌာန ရှိ ဝန်ထမ်းများ အားလုံး ကွန်ပျူတာ တတ်မြောက်ရေး ၊ စွမ်းဆောင်ရည် မြင့်မားရေးနှင့် လူစွမ်းအား အရင်းအမြစ် ဖွံ့ဖြိုး တိုးတက်ရေး စသည့် ရည်ရွယ်ချက် ကောင်းများအား အခြေခံ၍ ၂၀၁၃ ခုနှစ် နှစ်ဆန်းပိုင်း (၂၁-၁-၂၀၁၃) ရက်နေ့ မှ (၁၅-၂-၂၀၁၃) ရက်နေ့ထိ (၄)ပတ်ကြာ ကွန်ပျူတာ အခြေခံ သင်တန်း (၁/၂၀၁၃) အား သင်တန်းသား/ သူ (၁၆)ဦး ဖြင့် စီးပွားရေး နှင့် ကူးသန်း ရောင်းဝယ်ရေး ဝန်ကြီးဌာန ၊ ရုံးအမှတ်(၅၂) နယ်စပ် ကုန်သွယ်ရေး ဦးစီးဌာန၊ ကွန်ပျူတာ သင်တန်း ခန်းမ တွင် ဌာနရှိ ကွန်ပျူတာ ဘွဲ့ရ အရာထမ်း များမှ နည်းပြများ အဖြစ် တာဝန်ယူပြီး ဖွင့်လှစ် သင်ကြား ပို့ချလျက် ရှိပါသည်။

သင်တန်းတွင် ရုံးလုပ်ငန်းများ အတွက် အဓိက လိုအပ်သည့် Microsoft Office Application များဖြစ်သော Word, Excel, Power Point၊ ဌာန အတွင်း ဆောင်ရွက် ထားရှိသည့် E-Government စနစ်များ ၊ IP Star အကြောင်း သိကောင်း စရာများ ၊ Internet & email အသုံးပြု နည်းပညာများ စသဖြင့် လေ့ကျင့် သင်ကြား ပို့ချ သွားမည် ဖြစ်ကြောင်း သိရှိရ ပါသည်။

ကြာသပတေးနေ့ ၃၁ ဇန်နဝါရီလ ၂၀၁၃ 18:15 PM

ဗီယက်နမ်မှာ ပြည်တွင်း သကြား ထုတ်လုပ် သူများဟာ ထိုင်းနိုင်ငံမှ တင်သွင်းလာသော သကြား ဈေးများကို မယှဉ် နိုင်ကြောင်း ဗီယက်နမ် ကြံနဲ့ သကြား အသင်းမှ ပြောကြားခဲ့ ပါတယ်။ ထိုင်းမှ တင်သွင်းလာသော သကြား ဈေးဟာ ပြည်တွင်း ထုတ်လုပ်မှု ဈေးထက် သက်သာနေတဲ့ အတွက် သကြားစက် လုပ်ငန်းရှင်များနဲ့ တောင်သူများ အတွက် အကျိုး အမြတ် မရရှိနိုင်ဘဲ ဖြစ်နေတယ်လို့ သိရပါတယ်။ နှစ်ပေါင်း အတော်ကြာကပင် နှစ်စဉ် ပျမ်းမျှ သကြား တန် ၄ သိန်း ခန့်ဟာ ပြည်ပမှ တရားမဝင် ဗီယက်နမ် နိုင်ငံအတွင်းသို့ ဝင်ရောက် နေပါတယ်။ ကြံနဲ့ သကြား အသင်းဥက္ကဌ Nguyen Thanh Long က ထိုတရားမဝင် ဝင်ရောက်နေတဲ့ ပမာဏ ၄ သိန်းဟာ ပြည်တွင်း ဈေးကွက် မှာ ရောင်းချတဲ့ ပမာဏနဲ့ ၃ဝ ရာခိုင်နှုန်းခန့် ရှိတယ်လို့ ပြောကြား ပါတယ်။

An Giang ပြည်နယ် အနောက် တောင်းပိုင်းရှိ ဈေးကွက် စီမံခန့်ခွဲရေး (The Market Management Bureau) က An Giang Province ဟာ ထိုင်းမှ သကြားများ မှောင်ခိုဝင်တဲ့ အပေါက်ဖြစ်ပြီး တရားမဝင် ဝင်ရောက်မှုကို ကာကွယ် နိုင်ကြောင်းနဲ့ ပြဿနာ အသေး အဖွဲ့သာ ဖြစ်တယ်လို့ ဆိုပါတယ်။

မြစ်ဝှမ်း ဒေသရိ Kien Giang နဲ့ Nau Giang ပြည်နယ်များရှိ ကြံစိုက်ပျိုး တောင်သူများဟာ အရှုံးနဲ့ ရင်ဆိုင် နေကြ ရတယ်။ ဒေသရှိ စိုက်ပျိုးရေးနဲ့ နယ်စပ် ဒေသ ဖွံ့ဖြိုးရေး ဌာနက သကြားစက်များကို ကြံများ ရောင်းချပေးရန် တိုက်တွန်း ပြောကြားနေတဲ့ အတွက် ဖြစ်ပါတယ်။ သို့သော်လည်း ကြံရောင်းဈေးကို မမြှင့်ရန်နဲ့ သကြားစက်များ အနေနဲ့ ငွေရေး ကြေးရေးပိုင်းမှာ အရှုံးနဲ့ ရင်ဆိုင်ရဖွယ် ရှိတယ်လို့ ကြံနဲ့ သကြား အသင်းက တောင်သူများကို ပြောကြား ခဲ့ပါတယ်။

Viet Nam Economic Times ကို ကြံနဲ့ သကြား အသင်း ဥက္ကဌ Long က သကြားစက်များ အနေနဲ့ သကြား တစ်တန်ကို ထုတ်လုပ်ရာမှာ ၆၇၁ ဒေါ်လာ ထုတ်လုပ်မှု စရိတ် ကျသင့် သော်လည်း ရောင်းချရာမှာ တစ် တန်ကို ၆၂၃ ဒေါ်လာနဲ့ အရှုံးခံ ရောင်းချ ပေးနေရတာ ဖြစ်ပါတယ်။ ကြံစိုက် တောင်သူများဟာ ကြံဈေး ထပ်မကျမီ ၎င်းတို့ရဲ့ ကြံများကို သကြား စက်များကို အလု အယက် ရောင်းချ နေကြပါတယ်။ လတ်တလောမှာ Long An, Ben Tre, Soc Trang & Tra Vinh ပြည်နယ် များရှိ သကြား စက်များမှာ ကြံများ လိုအပ်တာထက် ပိုမို စုဆောင်း ထားပြီး ဖြစ်ပါတယ်။

Casuco သကြား ကုမ္ပဏီမှ ဒုတိယ ညွှန်ကြားရေးမှူးချုပ် Nguyen Hoang Ngoan က သကြား စက်ရုံများ အနေနဲ့ အရှုံးနဲ့ မယှဉ်ဆိုင် ရလေအောင် ကြံများကို တောင်သူများထံမှ ဈေးနှိမ် ဝယ်ယူ နေကြပါတယ်။ ကြံစိုက် တောင်သူများ အနေနဲ့ အမြတ် အစွန်း နည်းတဲ့ အတွက် လာမဲ့ ကြံရာသီမှာ ကြံစိုက်ပျိုးမဲ့ သူများ လျော့နည်း သွားဖွယ်ရှိ ပါတယ်။ ဗီယက်နမ် နှစ်သစ်ကူးပွဲ နီးကပ်လာပြီ ဖြစ်တာနဲ့ အမျှ ဗီယက်နမ်နဲ့ ကမ္ဘောဒီးယား နယ်စပ်မှလည်း တရားမဝင် သကြားများ ဆက်လက် ဝင်ရောက်မှု ရှိနေ သော်လည်း အာဏာပိုင်များ အပိုင်းသာ ထိန်းချုပ်နိုင်မှု မရှိဘူးလို့ VNS သတင်းမှာ ဖော်ပြထား ပါတယ်။

Source: VNS >>> CMK

ဗုဒ္ဓဟူးနေ့ ၃၀ ဇန်နဝါရီလ ၂၀၁၃ 15:04 PM

၂ဝ၁၂ ခုနှစ် ဒီဇင်ဘာလမှ အိန္ဒိယ နိုင်ငံမှာ ရော်ဘာ သုံးစွဲမှုဟာ ၇၈ဝဝဝ တန် ရှိခဲ့ပြီး ယမန်နှစ် ကာလတူ သုံးစွဲမှုထက် ၁ ဒသမ ၃ ရာခိုင်နှုန်း လျော့ကျ ခဲ့ပါတယ်။ တာယာ ထုတ်လုပ်မှုများ လျော့ကျ ခဲ့တဲ့ အတွက် ရော်ဘာ လိုအပ်ချက် လျော့နည်း သွားခြင်းကြောင့်လို့ သိရပါတယ်။ ရော်ဘာ ထုတ်လုပ်မှု ကတော့ ၁၁ဝဝဝဝ တန်ရှိပြီး ယမန်နှစ် ကာလတူ ထက် ၃ ရာခိုင်နှုန်း ပိုမို တိုးမြင့် လာတယ်လို့ သိရပါတယ်။ ပြည်တွင်း ပေါက်ဈေးနဲ့ နှိုင်းယှဉ်လျှင် နိုင်ငံ တကာ ပေါက်ဈေး သိသိသာသာ မြင့်တက်နေတဲ့ အတွက် ဒီဇင်ဘာလမှာ ပြည်ပမှ ရော်ဘာ တင်သွင်းမှုများလည်း လျော့နည်း ခဲ့ပါတယ်။ နိုဝင်ဘာလ နောက်ဆုံးပတ် ကစပြီး ဈေးကျ နေတာဖြစ်ပါတယ်။ ကမ္ဘာ့ပေါက်ဈေး ထက်လည်း ၁ ကီလိုကို ၂ဝ မှ ၂၅ ရူပီးဈေး နိမ့်လျက် ရှိပါတယ်။ ဈေးနှုန်း ကျနေပြီး အိန္ဒိယ ဈေးကွက်မှာ အရောင်း အဝယ်များ ထိုင်းမှိုင်း နေပါတယ်။ အဓိက တာယာ ထုတ်လုပ်သူများ ပြည်ပမှ ရော်ဘာ တင်သွင်းခြင်း ဟာလည်း ဒီဇင်ဘာလမှာ သိသိ သာသာ လျော့နည်း ကျဆင်း ခဲ့ပါတယ်။

နိုဝင်ဘာလ အစောပိုင်း ထိမှာတော့ ပြည်ပမှ ရော်ဘာ တင်သွင်းမှုဟာ ပုံမှန် ရှိနေပြီး ဒီဇင်ဘာလ မှာတော့ ယမန်နှစ် ကာလတူ နဲ့ နှိုင်းယှဉ်လျှင် ၃၅ ရာခိုင်နှုန်းထိ သိသိ သာသာ လျော့နည်း သွားခဲ့ပါတယ်။ လျော့ကျ လာမှုကို ကြည့်ခြင်း အားဖြင့် ၂ဝ၁၂-၂ဝ၁၃ တစ်နှစ်လုံး တင်သွင်းမှုဟာ တန်ချိန် နှစ်သိန်း အောက်ထိသာ ခွင့်ပြုသွားတယ် လို့သိရပါတယ်။ ရော်ဘာ လုပ်ငန်း ဘုတ် အဖွဲ့ရဲ့ အစောပိုင်း ထုတ်ပြန်ချက် အရ ၂ဝ၁၂-၂ဝ၁၃ မှာ ရော်ဘာတန် ၂ ဒသမ ၅ သိန်းခန့်သာ တင်သွင်းရန် ခန့်မှန်း ခဲ့တာ ဖြစ်ပါတယ်။ ယမန်နှစ် ကတော့ ၂ဝ၅ဝ၅ဝ တန်သာ တင်သွင်း ဖြစ်ပါတယ်။

Source: Business.std. com >>> CMK

ဗုဒ္ဓဟူးနေ့ ၃၀ ဇန်နဝါရီလ ၂၀၁၃ 12:29 PM

၂ဝ၁၃ ခုနှစ်၊ ဇန်နဝါရီလ ၁၇ ရက်နေ့ ဝ၈းဝဝ နာရီမှ စတင်ပြီး မူဆယ် ၁ဝ၅ မိုင် ကုန်သွယ်ရေး ဇုန်မှာ ယာဉ်စစ်ကွင်း အဝင် ဂိတ်ပေါက်မှ လေးမိုင်ခန့် အကွာရှိ အောက်တုံခမ် ကျေးရွာ မြကန်သာ စက္ကူ စက်ရုံအထိ ယာဉ်ကြော ပိတ်ဆို့မှု ဖြစ်ပွားခဲ့ရာ နယ်စပ် ကုန်သွယ်ရေး ဦးစီးဌာန ညွှန်ကြားရေးမှူး၊ ခရိုင် အထွေထွေ အုပ်ချုပ်ရေးမှူး၊ မြန်မာနိုင်ငံ ရဲတပ်ဖွဲ့နှင့် မြို့နယ် ယာဉ်ထိန်း ရဲတပ်ဖွဲ့ဝင်များ ပါဝင်တဲ့ အဖွဲ့မှ စုပေါင်း ဖြေရှင်း ဆောင်ရွက်ခဲ့မှုကြောင့် ၁ရး၃ဝ နာရီခန့်တွင် ယာဉ်ကြော ပိတ်ဆို့မှုကို ခေတ္တ ဖြေရှင်းနိုင် ခဲ့သော်လည်း ၁၈း၃ဝ နာရီခန့်မှာ ပြန်လည် ပိတ်ဆို့ သွားခဲ့ပါတယ်။

ယာဉ်ကြော ပြန်လည် ပိတ်ဆို့ သွားခဲ့တဲ့ အတွက် ပို့ကုန်၊ သွင်းကုန် ယာဉ်များ၊ ခရီးသည် တင်ယာဉ်ကြီးများ၊ ယာဉ်ငယ်များဟာ မူဆယ် ၁ဝ၅ မိုင် ကုန်သွယ်ရေး ဇုန်နဲ့ တုန်ခမ် ကျေးရွာတို့မှာ ညအိပ် ရပ်နားခဲ့ရတဲ့ အခြေအနေတွင် ရှိပါတယ်။ ယာဉ်ကြော ပိတ်ဆို့မှု အခြေအနေအား ဖြေရှင်းနိုင်ရန် အတွက် ၂ဝ၁၃ ခုနှစ်၊ ဇန်နဝါရီလ ၁၇ ရက်နေ့ ၂၁း၃ဝ နာရီ အချိန်မှာ ညတွင်းချင်း ရှင်းလင်း နိုင်ရေး အတွက် အကောက်ခွန် ပြည်နယ် ဦးစီးမှူးမှ နယ်စပ် ကုန်သွယ်ရေး ဦးစီးဌာန ညွှန်ကြားရေးမှူးအား ဇုန်ရုံးခန်းတွင် လာရောက် တွေ့ဆုံ ဆွေးနွေးရာ ဂျူတီပါရှိပြီး တစ်မယ်ချင်း တင်ထားတဲ့ ယာဉ်များ (ဥပမာ-သစ်သီး၊ ဓါတ်မြေသြဇာ) ယာဉ်တို့ကို ယာဉ်စစ်ကွင်း အတွင်းသို့ ပို့ကုန်ဝင်ပေါက်မှ ဝင်ရောက်စေခြင်း၊ ကုန်စုံကားများအား ဇုန်အတွင်း ပွဲရုံတန်းများရဲ့ လမ်းကြားနေရာမှာ ရပ်စေခြင်း၊ နောက်တစ်နေ့ နံနက်ပိုင်းမှာ စာရွက်စာတမ်း၊ ဂျူတီ ပြည့်စုံသော ယာဉ်များ စစ်ဆေးခံ နိုင်ရန် ယာဉ်စစ်ကွင်း အတွင်းသို့ ဝင်ရောက် နိုင်စေရေး စီစဉ် ဆောင်ရွက်ပေးရန်နဲ့ အကောက်ခွန် ဝန်ထမ်းများ ထုတ်နှုတ် ပူးပေါင်း ဆောင်ရွက် စေရန် ညှိနှိုင်း သဘော တူညီခဲ့ကြောင်း သိရပါတယ်။

၂ဝ၁၃ ခုနှစ်၊ ဇန်နဝါရီလ ၁၈ ရက်နေ့ ဝ၈းဝဝ နာရီ အချိန်က စတင်ပြီး ယာဉ်ကြော ပိတ်ဆို့မှုကို နယ်စပ်၊ အကောက်ခွန်၊ ခရိုင် အုပ်ချုပ်ရေးမှူး၊ မြို့နယ် အုပ်ချုပ်ရေးမှူး၊ ခရိုင်ရဲ၊ ယာဉ်ထိန်းရဲများ လမ်းကြောင်း တစ်လျှောက်နဲ့ ယာဉ်စစ်ကွင်း အတွင်းသို့ ဝင်ရောက်ကာ ဝိုင်းဝန်း ဖြေရှင်း ဆောင်ရွက်ရာတွင် ၁၂းဝဝ နာရီ အချိန်ခန့်မှာ ယာဉ်ကြော ပိတ်ဆို့မှု အခြေအနေကို လတ်တလော အဆင်ပြေစေရန် ဖြေရှင်း ဆောင်ရွက်နိုင်ခဲ့ပါတယ်။

ဒါပေမဲ့ ယာဉ်စစ်ကွင်း အတွင်း ယာဉ်များ စနစ်တကျ ရပ်တန့် စစ်ဆေးမှု မရှိခြင်းကြောင့် ပိတ်ဆို့ ကြပ်ပိတ် နေသဖြင့် မမျှော်လင့်သော မီးဘေး အန္တရာယ် ဖြစ်ပေါ်လာပါက ယာဉ်များ အလွယ်တကူ ဝင်/ထွက် မောင်းနှင် ရှောင်တိမ်းနိုင်မှု မရှိတဲ့ အတွက် မလိုလားအပ်တဲ့ ဆုံးရှုံး ပျက်စီးမှုများနဲ့ မလွဲမသွေ ရင်ဆိုင်ကြုံတွေ့ ရမှာဖြစ်တဲ့ အပြင် စနစ်တကျ စီမံခန့်ခွဲရန် ပျက်ကွက်ခြင်းကြောင့် သက်ဆိုင်ရာ ဌာနများ အပေါ်မှာ တာဝန်ရှိကြောင်း စွပ်စွဲပြစ်တင်မှု ပြုခြင်းကို ခံရမှာဖြစ်ပါတယ်။

လမ်းကြောင်းပေါ်မှာ ယာဉ်ကြော ပိတ်ဆို့မှု ထပ်မံ မဖြစ်ပွားစေရေး အတွက် ခရိုင် အုပ်ချုပ်ရေး အဖွဲ့ အကူအညီနဲ့ ယာဉ်ထိန်းရဲများ နေ့စဉ် တာဝန် ချထားခြင်း၊ ယာဉ်စစ်ကွင်း အတွင်းရှိ ယာဉ်များ မီးဘေး ကာကွယ်ရေး အတွက် စီမံချက် စနစ်တကျ ရေးဆွဲကာ မီးသတ်ဘူး၊ မီးချိတ်၊ မီးကတ်၊ သဲအိတ်၊ ရေပုံး၊ အရန်ရေများ အသင့် စုဆောင်း ပြင်ဆင် ထားရှိခြင်းနဲ့ မီးသတ် တပ်ဖွဲ့ရဲ့ အကူအညီ ရယူပြီး ဇာတ်တိုက် လေ့ကျင့်မှုများကို ဆောင်ရွက် သွားမှာ ဖြစ်ပါတယ်။

ယာဉ်စစ်ကွင်း အတွင်း ယာဉ်များ စနစ်တကျ ရှင်းလင်းစွာ အစစ်ဆေး ခံနိုင်ရေး အတွက် အကောက်ခွန် အဖွဲ့ကို ထိန်းကျောင်း ကြပ်မတ်မည့် စနစ် (သို့မဟုတ်) အဖွဲ့ တစ်ခုလိုအပ်မှာ ဖြစ်ကြောင်း၊ မန်ဝိန်း ဂိတ်မရှိတော့တဲ့ အတွက် မိမိ နိုင်ငံဘက်မှာ ဝင်ရောက် ညအိပ်တဲ့ သွင်းကုန်ကားများကို ယခင် ကျယ်ဂေါင် ညအိပ်ကွင်းကဲ့သို့ ကုန်တင် ယာဉ်ကြီး အစီးရေ ၃ဝဝ မှ ၅ဝဝ ခန့် အထိ ရပ်နားနိုင်တဲ့ သွင်းကုန် ညအိပ်ကွင်း တစ်ကွင်း (သို့မဟုတ်) အစီးရေ ၂၅ဝ ခန့် ရပ်နားနိုင်တဲ့ သွင်းကုန် ယာဉ် ညအိပ်ကွင်း နှစ်ကွင်းကို မြေသားကွင်း အဖြစ် အမြန် စီစဉ် ဆောင်ရွက် ပေးရန် လိုအပ်လျက် ရှိပါတယ်။

ကုန်သွယ်မှု မြင့်မား တိုးတက်လာခြင်း၊ ပြည်သူ့ ဆောက်လုပ်ရေး လုပ်ငန်းရဲ့ တန်ချိန် ကန့်သတ်ချက်ကြောင့် ယာဉ်စီးရေ တိုးတက် များပြား လာခြင်းတို့ကြောင့် လက်ရှိမူဆယ် ၁ဝ၅ မိုင် ကုန်စစ်ကွင်းမှာ သွင်းကုန် (သို့မဟုတ်) ပို့ကုန် တစ်မျိုးတည်း အသုံးပြုရန် အတွက်သာ သင့်တော်ပြီး လက်ရှိ နေရာ အနီးဝန်းကျင်မှာ ဧက(၃ဝ) (၄ဝ)ခန့် အကျယ်အဝန်း ရှိတဲ့ မြေနေရာ ရှာဖွေပြီး ပို့ကုန် (သို့မဟုတ်) သွင်းကုန် ယာဉ်စစ်ကွင်း တစ်ခု ထပ်မံ တည်ဆောက်ရန် လိုအပ်လျက် ရှိနေပါကြောင်း ရေးသား တင်ပြ လိုက်ရပါတယ်...

မြင့်ဦး (ကမရ)