Minister's Office

၁။           ယခုရက်သတ္တပတ် ဇန်နဝါရီလ ၆ ရက်မှ ၁၂ ရက်နေ့ထိ ပြည်ပပို့ကုန်မှာ တန်ဖိုး အမေရိကန်ဒေါ်လာ ၂၆၄ သန်းကျော်ရရှိသည်။ ယခုအပတ်တွင် လယ်ယာထွက်ကုန် တင်ပို့မှုမှ ဆန်/ ဆန်ကွဲ၊ ပဲမျိုးစုံ၊ သစ်သီးဝလံ၊ ‌ရော်ဘာ၊ နှမ်း တို့ ပမာဏအများဆုံးတင်ပို့ခဲ့သည်။

၂။            ဆန်ပြည်ပတင်ပို့ရာတွင် ပြည်တွင်းဖူလုံမှုနှင့် ဈေးနှုန်းတည်ငြိမ်ရေးကို ဦးစားပေးဆောင် ရွက်လျက်ရှိရာ ပြည်ပသို့ ဆန်တင်ပို့မှု စနစ်တကျရှိစေရေးအတွက် စီးပွားရေးနှင့်ကူးသန်းရောင်း ဝယ်ရေးဝန်ကြီးဌာနနှင့် မြန်မာနိုင်ငံဆန်စပါးအသင်းချုပ်တို့ ပူးပေါင်း၍ ဆန်စပါးသိုလှောင်မှုအား Online မှ မှတ်ပုံတင်ခြင်းစနစ် (Myanmar Rice Online - MyRo) အား အကောင်အထည်ဖော် ဆောင်ရွက်လျက်ရှိသည်။

၃။           ယခုအပတ် ဆန်တင်ပို့မှုတွင် အင်ဒိုနီးရှား၊ ဖိလစ်ပိုင်နိုင်ငံတို့မှ အများဆုံး ဝယ်ယူခဲ့ခြင်း ဖြစ်သည်။ အလားတူ မလေးရှား၊ ဘယ်လ်ဂျီယံ၊ ကင်မရွန်း၊ ဆလိုဗေးနီးယား၊ အီတလီ၊ ခရိုအေးရှား၊ ဘူဂေးရီးယား၊ အိုင်ဗရီကို့စ်နိုင်ငံတို့မှလည်း ဝယ်ယူမှုရှိခဲ့သည်။

၄။           ရော်ဘာပို့ကုန်တင်ပို့မှုအနေဖြင့် ရက်သတ္တပတ်အတွင်း တန်ချိန် ၇၃၂၆ တင်ပို့နိုင်ပြီး တန်ဖိုးအမေရိကန်ဒေါ်လာ ၁၀ သန်းခန့် ရရှိခဲ့သည်။ မှိုင်းခံရာဘာ (RSS) နှင့်ဆင့်တက်ပြုပြင်ထားသော (MIXTURES) ရော်ဘာမျိုးစုံကို ပင်လယ်ရေကြောင်းကုန်သွယ်မှုမှ တရုတ်၊ မလေးရှား၊ ဂျပန်၊ ဗီယက်နမ်၊ အင်ဒိုနီးရှား၊ ကိုရီးယားနိုင်ငံတို့သို့ တင်ပို့ခဲ့ပြီး နယ်စပ်လမ်းကြောင်းမှ အိမ်နီးချင်း တရုတ်၊ ထိုင်းနိုင်ငံများသို့ တင်ပို့ခဲ့သည်။

၅။           မြန်မာနိုင်ငံ၏ အဓိကစိုက်ပျိုး၊ မွေးမြူထွက်ကုန်များ ပြည်ပတင်ပို့မှု၌ ရာသီအလိုက် စိုက်ပျိုးသီးနှံများအပြင် ရာဘာကဲ့သို့နှစ်ရှည်သီးနှံများကိုလည်း တိုးချဲ့စိုက်ပျိုးထုတ်လုပ်ရန်လိုအပ် ပါသည်။ ရာဘာမှာ စတင်စိုက်ပျိုးသည်မှ ၇ နှစ်၊ ၈ နှစ် အကြာတွင် အစေးထုတ်ယူနိုင်သည်ဖြစ်ရာ ပြည်ပတင်ပို့မှုတွင် ဈေးကွက်ကျယ်ကျယ်ပြန့်ပြန့်ရရှိပြီးဖြစ်သည့် ရော်ဘာထုတ်လုပ်မှု စဉ်ဆက် မပြတ်တိုးတက်စေရန် မြန်မာနိုင်ငံရာဘာစိုက်ပျိုးထုတ်လုပ်သူများအသင်းနှင့် သက်ဆိုင်ရာဌာနများ မှဆွေးနွေးအကောင်အထည်ဖော် ဆောင်ရွက်လျက်ရှိသည်။

၆။      ရော်ဘာစိုက်ပျိုးထုတ်လုပ်မှုသည် ကမ္ဘာ့နိုင်ငံများအတွက် စဉ်ဆက်မပြတ်ဖွံ့ဖြိုးမှု ပန်းတိုင် များဖြစ်သည့် ပန်းတိုင် (၈) စဉ်ဆက်မပြတ် ဖြစ်ထွန်းပြီး အားလုံးအကျုံးဝင်သော ရေရှည် စီးပွားရေး ဖွံ့ဖြိုးတိုးတက်စေရေး၊ လုပ်သားပြည့် အလုပ်အကိုင်ရရှိရေးနှင့် အားလုံးအတွက် ထုတ်လုပ်နိုင်စွမ်းရှိ၍ သင့်တင့်လျောက်ပတ်သော အလုပ်အကိုင်ရရှိစေရေးကဏ္ဍနှင့်လည်း တိုက်ရိုက်ဆက်စပ်လျက်ရှိသည်။ စိုက်ပျိုးရေးဦးစီးဌာန၏ စာရင်းဇယားများအရ မြန်မာနိုင်ငံ၏ လက်ရှိရာဘာထုတ်လုပ်နိုင်မှုမှာ တစ်နှစ်လျှင် တန်ချိန်  ၃ သိန်းမှ ၄သိန်းခန့်ရရှိသည်။

၇။         ရော်ဘာပြည်ပသို့တင်ပို့မှုနှင့် သွင်းကုန်အစားထိုးကုန်ပစ္စည်းများထုတ်လုပ်နိုင်မှု တိုးတက် စေခြင်းဖြင့်  နိုင်ငံ့စီးပွားရေးအတွက် ခိုင်မာသောအခြေခံအုတ်မြစ်အဖြစ် အကျိုးသက်ရောက်မှုများ ရရှိလာနိုင်မည်ဖြစ်သည်။

၈။         ကုန်ထုတ်လုပ်မှုများ  တန်ဖိုးမြှင့်ထုတ်လုပ်နိုင်ရေး၊ အရည်အသွေးရှိသော ထုတ်ကုန် ကုန်ကြမ်းများအား တီထွင်ဆန်းသစ်သော နည်းလမ်းများဖြင့် အဆင့်မြှင့်တင်ပို့နိုင်ရေး နည်းပညာဆိုင်ရာ လိုအပ်ချက်များရှိပါက သက်ဆိုင်ရာ အသင်းအဖွဲ့များ၊ နည်းပညာရှင်များနှင့် ချိတ်ဆက် ခြင်းဖြင့် အဆင့်မီပို့ကုန်များရရှိရေးအတွက် ရင်းနှီးမြှုပ်နှံမှုများကို မြှင့်တင်ကာ အစိုးရ၊ ပုဂ္ဂလိက အလွှာပေါင်းစုံမှ ပူးပေါင်းဆောင်ရွက်သွားကြရန် ယခုရက်သတ္တပတ်ပို့ကုန်တင်ပို့နိုင်မှု အခြေအနေ အားဖော်ပြတိုက်တွန်းအပ်ပါသည်။

   ၂၀၂၃-၂၀၂၄ ဘဏ္ဍာနှစ်၊ ဒီဇင်ဘာလ ၃၀ ရက်မှ ဇန်နဝါရီလ ၅ ရက်ထိ ရက်သတ္တပတ်တွင် မြန်မာနိုင်ငံ၏ ပြည်ပပို့ကုန် တင်ပို့မှုတန်ဖိုး အမေရိကန်ဒေါ်လာ ၂၃၄ သန်းကျော် ရရှိခဲ့သည်။ ယခုရက်သတ္တပတ်တွင် လယ်ယာကဏ္ဍမှ ‌ပြောင်း၊ ပဲစဉ်းငုံ၊ ကုလားပဲ၊ ထောပတ်ပဲ၊ မြေပဲဆံ၊ နှမ်း၊ ကြက်သွန်နီ၊ ဂျင်းခြောက်၊ မန်ကျည်းသီး၊ သစ်သီးဝလံ ဖရဲသီး၊ ထောပတ်သီး၊ လိမ္မော်သီး၊ တစ်သျှူး ငှက်ပျောသီး၊ ငှက်ပျောသီး(ရိုးရိုး) တို့တင်ပို့မှုပိုမိုခဲ့သည်။

   တရုတ်နှစ်သစ်ကူးကာလ နီးကပ်လာသဖြင့် တရုတ်နိုင်ငံမှ မြန်မာ့သစ်သီးဝလံများအား ဝယ်လိုအား ပြန်လည်မြင့်တက်ခဲ့သည်။  ယခုရက်သတ္တပတ်တွင် ဖရဲ၊ သခွား (သခွားမွှေး)၊ ငှက် ပျောသစ်သီးဝလံများကို ကျိုင်းတုံ၊ လွယ်ဂျယ်၊ ကံပိုင်တည်နယ်စပ်တို့မှ တစ်ဆင့် တရုတ်နိုင်ငံသို့ တန်ချိန် ၃၅,၀၀၀ ခန့်ထိတိုးတက်တင်ပို့နိုင်ခဲ့သည်။ ထို့အပြင် တာချီလိတ်၊ မောတောင်နယ်စပ်တို့မှ တစ်ဆင့် ထိုင်းနိုင်ငံသို့ လိမ္မော်သီး၊ ထောပတ်သီး၊ ငှက်ပျောသီးများကိုလည်း တင်ပို့လျက်ရှိသည်။ ယခုအပတ် သစ်သီးဝလံတင်ပို့မှု တန်ဖိုး စုစုပေါင်း အမေရိကန်ဒေါ်လာ ၁၀ သန်းကျော်အထိရရှိခဲ့ သည်။

   မြန်မာ့ပြောင်းအား ထိုင်းနိုင်ငံမှ အခွန်ကင်းလွတ်ခွင့်ဖြင့် တင်သွင်းခွင့်ပြုသည့် ကာလအစ ဖေဖော်ဝါရီလသို့ ရောက်ရှိတော့မည်ဖြစ်၍ ပြောင်း ပိုမိုတင်ပို့လာနိုင်တော့မည်ဖြစ်သည်။ နှစ်စဉ် ပြောင်းစေ့ တန်ချိန် ၂.၆ သန်းအထိ တင်ပို့မှုရှိရာ ယခုနှစ်တွင်လည်း ပြောင်းလုပ်ငန်းရှင်များအနေ ဖြင့် အဓိကဈေးကွက် ထိုင်းနိုင်ငံအပါအဝင် ပြောင်းဝယ်လိုအားများပြားသည့် ဖိလစ်ပိုင်၊ တရုတ်၊ စင်္ကာပူ၊ ဗီယက်နမ်နိုင်ငံများသို့ တိုးတက်တင်ပို့နိုင်ရေး၊ ယခင်ဈေးကွက်ရရှိတင်ပို့ခဲ့ပြီး လက်ရှိတင်ပို့ မှုပျောက်ကွယ်နေသည့် ဘင်္ဂလားဒေ့ရှ်၊ အိန္ဒိယ၊ ဂျပန်၊ ထိုင်ဝမ်၊ မလေးရှား၊ နီပေါ၊ သီရိလင်္ကာ၊ ယူအေအီး စသည့်ဈေးကွက်များသို့ ပြန်လည်တင်ပို့နိုင်ရေးကို ချိတ်ဆက်ဆောင်ရွက်နေ ကြပြီဖြစ် သည်။

   စိုက်ပျိုးမွေးမြူရေးကဏ္ဍမှ လယ်ယာထွက်ကုန်များ တင်ပို့နိုင်သည့်နည်းတူ ယခုရက်သတ္တ ပတ်တွင် ရေထွက်ပစ္စည်းများကိုလည်း ပင်လယ်ရေကြောင်း၊ လေကြောင်းနှင့် နယ်စပ်ကုန်သွယ်မှု တို့မှ ပိုမိုတိုးတက်တင်ပို့နိုင်ခဲ့သည်။ ရေထွက်ကုန်များကို ယခုအပတ်တွင် ပင်လယ် ရေကြောင်း/ လေကြောင်းဖြင့် နိုင်ငံပေါင်း ၂၀ သို့ တန်ချိန် ၃,၀၇၀ နှင့် တရုတ်၊ ထိုင်း အိမ်နီးချင်း နိုင်ငံများသို့ နယ်စပ်စခန်းများမှတစ်ဆင့် တန်ချိန် ၇,၇၈၀၊ စုစုပေါင်း တန်ချိန် ၁၀,၈၅၀ တင်ပို့နိုင်ခဲ့သည်။  ပြည်တွင်းမွေးမြူရေး ငါးများဖြစ်သည့် ငါးမြစ်ချင်း၊ ငါးတန်၊ ရွှေဝါငါးကြင်း၊ တီလားဗီးယား၊ ငါးခုံးမ၊ ငါးသိုင်းခေါင်းပွစသည့် အမျိုးအစားပေါင်းစုံလင်စွာ တင်ပို့မှုရှိသည်။

   မြန်မာနိုင်ငံအနေဖြင့် ပြည်ပသို့ ငါး၊ ပုစွန် အပါအဝင် ရေထွက်ကုန်ပစ္စည်းများတင်ပို့မှု ပမာဏကို မြှင့်တင်ရာ၌ မွေးမြူရေး လုပ်ငန်းများနှင့် မွေးမြူရေးစနစ်များ ပိုမိုကောင်းမွန်လာစေရန် တိုးချဲ့လုပ်ကိုင်လျက်ရှိသည်။ တနင်္သာရီတိုင်း၊ မြိတ်ကျွန်းစုရှိ ပုစွန်မွေးမြူရေးကန်များမှ မွေးမြူ ထုတ်လုပ်သည့် ပနားမီးပုစွန်များကို တရုတ်၊ ဂျပန်ဈေးကွက်များသို့ တင်ပို့လျက်ရှိပြီး ဧရာဝတီ တိုင်း၊ ပန်းတနော်ရှိ ပြည်ပတင်ပို့မှုအတွက်ရည်ရွယ်သည့် ငါးတန်မွေးမြူရေးစီမံကိန်းမှ ယခုနှစ် အတွင်း ပြည်ပတင်ပို့နိုင်ရေးကို စီစဉ်ဆောင်ရွက်လျက်ရှိသည်။

   နိုင်ငံတော်၏ စီးပွားရေးဦးတည်ချက် (၃) ရပ်အနက် ပထမဦးတည်ချက်ဖြစ်သည့် တိုင်းပြည် သာယာဝပြောရေးနှင့် စားရေရိက္ခာဖူလုံရေးတို့အတွက် တိုင်းရင်းသားပြည်သူတစ်ရပ်လုံး နှင့်အကျုံး ဝင်သော စိုက်ပျိုးရေးနှင့် မွေးမြူရေးကို ခေတ်မီနည်းစနစ်များဖြင့် တိုးတက်အောင်ဆောင်ရွက်ပြီး အခြားစီးပွားရေးကဏ္ဍများကိုလည်း ဘက်စုံဖွံ့ဖြိုးတိုးတက်အောင် တည်ဆောက်ရန်အတွက် စိုက် ပျိုးရေးနှင့် မွေးမြူရေးထုတ်ကုန်များ ပိုမိုစိုက်ပျိုး၊ ထုတ်လုပ်၊ တိုးတက်တင်ပို့ ဆောင်ရွက်သွားရန် တိုက်တွန်းအပ်ပါသည်။

နေပြည်တော်၊ ဒီဇင်ဘာ ၂၂ အမျိုးသားအဆင့်လျှပ်စစ်သုံးယာဉ်နှင့် ဆက်စပ်လုပ်ငန်းများဖွံ့ဖြိုးတိုး တက်ရေးဦးဆောင် ကော်မတီ၏ ခွင့်ပြုချက်ဖြင့် UV Automotive Co., Ltd. မှ တင်သွင်းလာ‌သော တရုတ်နိုင်ငံထုတ် Hongqi EQM5 အမျိုးအစား လျှပ်စစ်သုံးမော်တော်ယာဉ်များသည် ရန်ကုန်ဆိပ်ကမ်းသို့ ရောက်ရှိလာပါသဖြင့် (၂၂-၁၂-၂၀၂၃) ရက်နေ့တွင် လုပ်ထုံးလုပ်နည်းနှင့်အညီ ထုတ်ယူခွင့်ပြုခဲ့ပါကြောင်း သတင်းရရှိပါသည်။

၂၀၂၃ ခုနှစ်၊ ဒီဇင်ဘာလ၏ ပထမရက်သတ္တပတ်အတွင်း မြန်မာနိုင်ငံ၏ ပြည်ပပို့ကုန် တင်ပို့မှု တန်ဖိုးမှာ အမေရိကန် ဒေါ်လာ ၂၂၁ သန်းရှိပါသည်။ သီးနှံရာသီပြက္ခဒိန်၏ ရလဒ်များ ပေါ်ထွန်းရာ သီဖြစ်သည်နှင့်အညီ လယ်ယာထွက်ကုန်များစွာ လှိုင်လှိုင်တင်ပို့လာနိုင်တော့မည့် ကာလဖြစ်ပါ သည်။ ယခုရက်သတ္တပတ်အတွင်း ဆန်၊ ဆန်ကွဲ၊ မတ်ပဲ၊ ပဲတီစိမ်း၊ ပဲလွန်းဖြူ၊ မြေထောက်ပဲ၊ မြေပဲဆံ၊ နှမ်း၊  ပြောင်း၊ ရော်ဘာ၊ သစ်သီးဝလံ၊ ဝဥ၊ ဂျင်းခြောက်၊ သီဟိုဠ်၊ ငရုတ်၊ ကွမ်းသီး၊ မန်ကျည်းသီးများ တင်ပို့နိုင်ခဲ့ပါသည်။

          ရေထွက်ကုန်ပစ္စည်းတင်ပို့မှု၌လည်း ရက်သတ္တပတ်လျှင် အမေရိကန်ဒေါ်လာ ၂၀ သန်းကျော် ထိရှိပြီး ပင်လယ်ရေကြောင်း/ လေကြောင်းမှ  တရုတ်၊ မလေးရှား၊ ဗီယက်နမ်၊ ကိုရီးယား၊ ဂျပန်၊ သြစတြေးလျ၊ ထိုင်ဝမ်၊ စင်္ကာပူ၊ ဆော်ဒီအာရေဗျ၊ အမေရိကန်၊ ကနေဒါ၊ အိုမန်၊ ယူအေအီး၊ ယူကေ၊ ​လက်ဘနွန်၊ ဟောင်ကောင်၊ ဘရာဇီးနိုင်ငံ စျေးကွက်များနှင့် နယ်စပ်ကုန်သွယ်မှုတွင် ကော့သောင်း၊ မြိတ်၊ မောတောင်၊ မြဝတီစခန်းများမှ ငါးမျိုးစုံနှင့် ငါးမှုန့်၊ ငါးခြောက် ရေထွက်ကုန်များ ပိုမိုတင်ပို့ လာ နိုင်ပါသည်။

           ယခုအပတ်၌ ပုဂ္ဂလိကကဏ္ဍမှ တင်ပို့မှုများအပြင် နိုင်ငံပိုင်ကဏ္ဍမှလည်း မြန်မာ့ကျောက်မျက် ရတနာပြပွဲများတွင် ရောင်းချထားသည့် ကျောက်စိမ်း ၃၂၂၈ ကီလိုကို တရုတ်နိုင်ငံသို့ တင်ပို့ခဲ့ပါသည်။ တန်ဖိုးမြှင့် ကျောက်စိမ်း၊ ကျောက်မျက်အချောထည်များဖြစ်သည့် ကျောက်စိမ်း လက်ကောက်/ ပုတီးစေ့/လည်ဆွဲ၊ ကျောက်စိမ်းလက်ပတ်များကိုလည်း မြန်မာ့ကျောက်မျက်ရတနာရောင်းဝယ်ရေး လုပ်ငန်း၏ One Stop Services Centre များတွင် ဝယ်ယူပြီး လေကြောင်းခရီးဖြင့် တရုတ်နိုင်ငံ စျေးကွက်သို့ တင်ပို့လျက်ရှိပါသည်။

          ပို့ကုန်တင်ပို့သူများ အကျိုးအမြတ်ရရှိပြီး ပြည်တွင်းစျေးကွက် လိုအပ်ချက်ရှိသည့် ဓာတ်မြေ သြဇာ၊ စက်သုံးဆီစသည့် အဓိကကုန်စည်များတင်သွင်းခြင်းဖြင့် ကုန်စည်စီးဆင်း လည်ပတ်မှု (Turn Over) မြန်ဆန်ရေးအတွက် ရော်ဘာပို့ကုန်ရငွေဖြင့် ဓာတ်မြေသြဇာတင်သွင်းခွင့် အစီအစဉ် များခွင့်ပြုပေးလျက်ရှိရာ ဒီဇင်ဘာလဆန်း၌ ရော်ဘာတင်ပို့မှုသည် ပြီးခဲ့သည့်လထက် နှစ်ဆကျော် တိုးတက်တင်ပို့လာနိုင်ကြောင်း တွေ့ရှိရပါသည်။

          ထို့အပြင် ယခုပွင့်လင်းရာသီအချိန်၌ တိရစ္ဆာန်ထွက် သားရေစိမ်းနှင့် သားရေချော တင်ပို့မှု၊ သစ်အချောထည်ပစ္စည်းများတင်ပို့မှု၊ စက်မှုကုန်ချောပစ္စည်းများဖြစ်သည့် သကြား၊ CMP ချုပ်ပြီး အထည်တို့လည်း တင်ပို့မှုပိုမိုလာကြောင်း တွေ့ရှိရပါသည်။

      ကုန်သွယ်မှုကဏ္ဍတွင် လက်ရှိကုန်သွယ်မှုဆောင်ရွက်နေသော နိုင်ငံများနှင့် ကုန်သွယ်မှုတိုး တက်မြင့်မားစေရေး၊ အမယ်သစ် ပို့ကုန်များ တိုးတက်တင်ပို့နိုင်ရေးနှင့် ကုန်သွယ်မှုနိုင်ငံသစ်များကို ရှာဖွေရင်း ကမ္ဘာ့ဈေးကွက်သို့ မြန်မာ့ထွက်ကုန်များ ကျယ်ကျယ်ပြန့်ပြန့် ပိုမိုတင်ပို့နိုင်ရေးအတွက် သက်ဆိုင်ရာဌာနများ၊ အသင်းအဖွဲ့များ၊ လုပ်ငန်းရှင်များအားလုံး အစိုးရ-ပုဂ္ဂလိက တွဲလက်ညီညီ ဝိုင်းဝန်းကြိုးပမ်းဆောင်ရွက်ကြရန် တိုက်တွန်းလိုက်ပါသည်

   မြန်မာအထူးစီးပွားရေးဇုန်ဆိုင်ရာ ဗဟိုလုပ်ငန်းအဖွဲ့၏ (၄/၂၀၂၃) ကြိမ်မြောက် အစည်းအဝေးအား ၂၀၂၃ ခုနှစ်၊ ဒီဇင်ဘာလ ၁၁ ရက် နေ့၊ မွန်းလွဲပိုင်းက စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ညီလာခံခန်းမ၌ ကျင်းပပြုလုပ်ခဲ့ပါသည်။ အစည်းအဝေးတွင် မြန်မာအထူးစီးပွားရေးဇုန်ဆိုင်ရာ ဗဟိုလုပ်ငန်းအဖွဲ့ ဥက္ကဋ္ဌ၊ ပြည်ထောင်စုအစိုးရ အဖွဲ့ရုံးဝန်ကြီးဌာန (၁)၊ ပြည်ထောင်စုဝန်ကြီး ဦးအောင်နိုင်ဦး အမှာစကားပြောကြားခဲ့သည်။

   ဗဟိုလုပ်ငန်းအဖွဲ့ ဥက္ကဋ္ဌက ပြောကြားရာတွင် စီးပွားရေးရာကော်မတီ အစည်းအဝေးအမှတ်စဉ် (၇/၂၀၂၃) တွင် နိုင်ငံတော်စီမံ အုပ်ချုပ်ရေးကောင်စီဥက္ကဋ္ဌက အထူးစီးပွားရေးဇုန်များသည် မိမိတို့နိုင်ငံအတွက်သာမက ဒေသတွင်းနိုင်ငံများ၏ စီးပွားရေးနှင့် ဖွံ့ဖြိုးတိုးတက်ရေးတို့အတွက် အထောက်အကူပြုသဖြင့် အမြန်ဆုံးတိုးတက်မှုရရှိရန်နှင့် လုပ်ငန်းများ အောင်မြင်စွာလည်ပတ်နိုင်ရေး ဆောင်ရွက်ရန်လိုကြောင်း၊ အလားတူ ကျောက်ဖြူရေနက်ဆိပ်ကမ်း၊ ထားဝယ်ရေနက်ဆိပ်ကမ်းများသည်လည်း နိုင်ငံဖွံ့ဖြိုးတိုးတက်ရေး အတွက် အထောက်အကူပြုစေနိုင်သည့်အတွက် စီမံကိန်းများအမြန်ဆုံး အကောင်အထည်ဖော် ဆောင်ရွက်သွားရန်လိုကြောင်း လမ်းညွှန်မှာကြားခဲ့ပါကြောင်း၊ ကျောက်ဖြူရေနက်ဆိပ်ကမ်းနှင့်ပတ်သက်၍ ယခင်အစိုးရ လက်ထက်တွင် လက်မှတ်ရေးထိုးထား ပြီးဖြစ်သော လုပ်ငန်းလုပ်ကိုင်ခွင့် သဘောတူစာချုပ်အား ပိုမိုကောင်းမွန်၍ ရှင်းလင်းပြည့်စုံမှုရှိစေရေးအတွက် ရင်းနှီးတည်ဆောက်သူ ဖြစ်သည့် China International Trust Investment Corporation–CITIC နှင့် ညှိနှိုင်းမှုများ ဆောင်ရွက်ခဲ့ရာ နှစ်ဦးနှစ်ဖက် အပြုသဘောဆောင်သည့် ဆွေးနွေးမှုများကြောင့် ညှိနှိုင်းမှုများ ပြီးပြတ်ခဲ့ပြီဖြစ်ပြီး မကြာမီအတွင်းနောက်ဆက်တွဲ ဖြည့်စွက်စာချုပ်ကို လက်မှတ်ရေးထိုးနိုင်တော့မည်ဖြစ်ပါကြောင်း၊ ကျောက်ဖြူရေနက်ဆိပ်ကမ်းစီမံကိန်း တည်ဆောက်ရေးလုပ်ငန်းများ စတင်ချိန်တွင် ဒေသခံရခိုင်တိုင်းရင်းသားများအပါအဝင် နိုင်ငံသားလူငယ်များ  အလုပ်အကိုင်အခွင့်အလမ်း ရရှိစေရေးအတွက် တည်ဆောက်ရေး လုပ်ငန်းဆိုင်ရာ အသက်မွေးဝမ်း‌ကျောင်းပညာသင်ကြားရေး အစီအစဉ်များကို စတင်ပြင်ဆင်ထားရန် ဖြစ်ပါကြောင်း၊ ကျောက်ဖြူ ရေနက်ဆိပ်ကမ်း စီမံကိန်းတွင် နိုင်ငံသားကုမ္ပဏီများ ပါဝင်ရင်းနှီးမြှုပ်နှံနိုင်ရေးအတွက် အစိုးရအသိအမှတ်ပြု ကုမ္ပဏီစု (Government Designated Entity Consortium) ဖွဲ့စည်းနိုင်ရေး နိုင်ငံပိုင် သတင်းစာများတွင် စိတ်ဝင်စားမှု အဆိုပြုလွှာကြေညာ ဖိတ်ခေါ်ခဲ့ပြီးဖြစ်၍ အဆိုပြုလွှာ တင်သွင်းလာသည့် ကုမ္ပဏီများအား စိစစ်ရွေးချယ်သည့်လုပ်ငန်းစဉ်များ မကြာမီဆက်လက်ဆောင်ရွက်တော့မည် ဖြစ်ပါကြောင်း၊ ကျောက်ဖြူရေနက်ဆိပ်ကမ်း စီမံကိန်းသည် နိုင်ငံတော်အတွက်သာမက နိုင်ငံသားစီးပွားရေးလုပ်ငန်းရှင်များ၊ တိုင်းရင်းသား လူငယ်များအတွက်လည်း အခွင့်အလမ်းများ ပေါ်ပေါက်စေမည် ဖြစ်ပါကြောင်း၊ သီလဝါအထူး စီးပွားရေးဇုန်အတွင်းရှိ စီးပွားရေးလုပ်ငန်းများ အဆင်ပြေချောမွေ့စွာ လည်ပတ်ဆောင်ရွက်နိုင်ရေးအတွက်လည်း လိုအပ်သည်များ ညှိနှိုင်း ဆောင်ရွက်ပေးလျက်ရှိပါကြောင်း၊ နိုင်ငံခြားသုံးငွေ စီမံခန့်ခွဲရေးကော်မတီအနေဖြင့်လည်း သီလဝါအထူးစီးပွားရေးဇုန်အတွင်းရှိ ရင်းနှီးမြှုပ်နှံမှုလုပ်ငန်းများအဆင်ပြေချောမွေ့စေရေးအတွက် လိုအပ်သလို စီမံဆောင်ရွက်ပေးလျက်ရှိပါကြောင်း၊ အထူးစီးပွားရေးဇုန်များအနေဖြင့် ဇုန်အတွင်းရှိ ရင်းနှီးမြှုပ်နှံသူများနှင့် ဇုန်ပြင်ပရှိ အသေးစား၊ အငယ်စား၊ အလတ်စား စီးပွားရေးလုပ်ငန်းများ ပိုမိုချိတ်ဆက်ဆောင်ရွက်နိုင်ရေး ကြိုးပမ်းဆောင်ရွက်သွားရန် လိုအပ်ပါကြောင်းပြောကြားပါသည်။

   ထို့နောက် အစည်းအဝေးသို့ တက်ရောက်လာကြသည့် မြန်မာအထူးစီးပွားရေးဇုန်ဆိုင်ရာ ဗဟိုလုပ်ငန်းအဖွဲ့ ဒုတိယဥက္ကဋ္ဌ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဦးထွန်းအုံနှင့် အဖွဲ့ဝင်များ၊ အထူးစီးပွားရေးဇုန် စီမံခန့်ခွဲမှုကော်မတီများနှင့် ဌာနဆိုင်ရာ အသီးသီးမှ တာဝန်ရှိသူများက အထူးစီးပွားရေးဇုန်များ ပိုမိုဖွံ့ဖြိုးတိုးတက်လာစေရေးနှင့် ဆက်လက်ဆောင်ရွက်ရမည့် လုပ်ငန်းကိစ္စရပ်များကို ဝိုင်းဝန်းဆွေးနွေး အကြံပြုတင်ပြခဲ့ကြပြီး မြန်မာအထူးစီးပွားရေးဇုန်ဆိုင်ရာ ဗဟိုလုပ်ငန်းအဖွဲ့ဥက္ကဋ္ဌက လိုအပ်သည်များ ပေါင်းစပ်ညှိနှိုင်း ဆောင်ရွက်ပေးခဲ့သည်။

   အစည်းအဝေးသို့ မြန်မာအထူးစီးပွားရေးဇုန်ဆိုင်ရာ ဗဟိုလုပ်ငန်းအဖွဲ့ ဒုတိယဥက္ကဋ္ဌနှင့် အဖွဲ့ဝင်များ၊ သီလဝါ၊ ကျောက်ဖြူနှင့် ထားဝယ်အထူးစီးပွားရေးဇုန် စီမံခန့်ခွဲမှုကော်မတီ ဥက္ကဋ္ဌများနှင့် ဌာနဆိုင်ရာအသီးသီးမှ တာဝန်ရှိသူများ တက်ရောက်ခဲ့ကြကြောင်း သတင်းရရှိသည်။