နောက်ဆုံးရ သတင်း
ဂျပန်စီးပွားရေးလုပ်ငန်းရှင်များနဲ့ ရင်းနှီးမြှုပ်နှံသူများဟာ မြန်မာနိုင်ငံမှာလာရောက်ရင်းနှီးမြှုပ်နှံရန် အတွက် ထိုင်းနိုင်ငံကိုဝင်ပေါက်တစ်ခုအဖြစ် ရှုမြင်နေကြပါတယ်။ ထားဝယ်ရေနက်ဆိပ်ကမ်းဖွံ့ဖြိုးတိုးတက်ရေးနဲ့ ထိုင်းနိုင်ငံဟာမြန်မာနိုင်ငံနဲ့ နယ်နိမိတ်ချင်းဆက်စပ်နေမှုကလည်း အကျိုးရှိစေတယ်လို့ ယုံကြည်နေကြပါတယ်။ ထိုင်းကုန်သွယ်ရေးဝန်ကြီး Boonsong Teriyaphirom နဲ့ အပြည်ပြည်ဆိုင်ရာ ခမ်းဆိုင်စီးပွားရေးအဖွဲ့ချုပ် ဒုတိယဥက္ကဌ Masayuki Matsushita တို့ အောက်တိုဘာလတတိယပတ်အတွင်းတွေ့ဆုံခဲ့ပြီးနောက် ဂျပန်စီးပွားရေး လုပ်ငန်းရှင်များဟာ မြန်မာနိုင်ငံမှာရင်းနှီးမြှုပ်နှံမှုလုပ်ဆောင်နေတဲ့ ထိုင်းနိုင်ငံမှစီးပွားရေးလုပ်ငန်းရှင်များနဲ့ ပူးပေါင်းကြဖို့ဆန္ဒရှိနေတယ်လို့ Matsushita က ပြောကြားခဲ့တာဖြစ်ပါတယ်။ထားဝယ်ရေနက်ဆိပ်ကမ်းစီမံကိန်းမှာ ထိုင်းနိုင်ငံက ထဲထဲဝင်ဝင်လုပ်ကိုင်နေမှုဟာ မြန်မာနိုင်ငံမှာ ဂျပန်စီးပွားရေးလုပ်ငန်းရှင်များ လာရောက်ရင်းနှီးမြှုပ်နှံနိုင်ရေးအတွက် အခွင့်အလမ်းလမ်းစဖြစ်စေပါတယ်။ မြန်မာနိုင်ငံမှာ အခြေခံအဆောက်အဦးများ လျင်မြန်စွာဖွံ့ဖြိုးတိုးတက်ရန် လိုအပ်နေသော်လည်း အနာဂတ်မှာ ဂျပန်စီးပွားရေးလုပ်ငန်းရှင်များရင်းနှီးမြှုပ်နှံရန် စိတ်ဝင်စားမှုအများဆုံးရှိတဲ့ နိုင်ငံတစ်ခုဖြစ်တယ်လို့ Matsushita က ဆိုပါတယ်။ ဂျပန်စီးပွားရေးလုပ်ငန်းရှင် အတော်များများဟာ မြန်မာနိုင်ငံမှာ စီးပွားရေးလုပ်ငန်း များ လာရောက်လုပ်ကိုင်လျှင် အခွင့်အလမ်းများစွာရရှိနိုင်မယ်ဆိုတာကို ယုံကြည်လျက်ရှိကြပါတယ်။ လုပ်ငန်း တိုင်းအရွယ်အစား (အကြီးစား၊ အလတ်စား)မရွေး စီးပွားရေးအခွင့်အလမ်းများစွာရှိနေပြီး ယခုအချိန်မှာအခြေခံ အဆောက်အဦးများ ဖွံ့ဖြိုးတိုးတက်ရေးအပိုင်းကို ပိုမိုစိတ်ဝင်စားလျက်ရှိပါတယ်။ အပြည်ပြည်ဆိုင်ရာကုန်သွယ်မှုမြှင့်တင်ရေးဌာနမှ ညွှန်ကြားရေးမှူးချုပ် Srirat Rastapara က ဂျပန် စီးပွားရေးလုပ်ငန်းရှင်အများစုဟာ ထိုင်းစီးပွားရေးလုပ်ငန်းရှင်များနဲ့ အပြန်အလှန်ဆက်ဆံမှုများရှိနေပြီး ထိုင်းနိုင်ငံ မှတဆင့်
မြန်မာနဲ့အခြားအာဆီယံနိုင်ငံများနဲ့ ကူးသန်းရောင်းဝယ်မှုလုပ်ကိုင်ရန် စိတ်ဝင်စားလျက်ရှိနေကြတယ်လို့ ဆိုပါတယ်။
ထိုင်းနိုင်ငံအနေနဲ့ ယမန်နှစ်ကရေကြီးနစ်မြှုပ်ခံရသည့် စက်မှုလုပ်ငန်းများပြန်လည်ထူထောင်နိုင်ရေး ကြိုးပမ်းဆောင်ရွက်လျက်ရှိပြီးဂျပန်စီးပွားရေးလုပ်ငန်းရှင်များကတော့ ထိုင်းနိုင်ငံတွင် လာရောက်လုပ်ကိုင်ရန် ယုံကြည်မှုရှိနေဆဲ ဖြစ်ပါတယ်။ ထိုင်းနိုင်ငံကလည်း အာဆီယံနိုင်ငံများအတွင်း ဂျပန်နိုင်ငံမှလာရောက်ရင်းနှီးမြှုပ်နှံ ကြမဲ့စီးပွားရေးလုပ်ငန်းရှင်များနဲ့ ကုန်သည်များကိုပံံ့ပိုးခြင်း၊ ပူးပေါင်းဆောင်ရွက်ခြင်းများ လုပ်ဆောင်သွားမယ်လို့ Srirat Rastapara က ဆိုပါတယ်။
Source: The Nation
CMK
မြန်မာ-အိန္ဒိယနှစ်ဖက်နိုင်ငံ ကုန်ပစ္စည်းရောင်းဝယ်ဖောက်ကားတဲ့ နန့်ဖာလုံဈေးမှာ အဓိကရောင်းဝယ်ကြတဲ့ပစ္စည်းများထဲမှာ ဖယောင်းတိုင်ဟာဈေးကွက်ဝင်တွက်ချေကိုက်တဲ့ ထုတ်ကုန်ပစ္စည်းတစ်မျိုးဖြစ်ပါတယ်။ တမူးမြို့မှာ ဖယောင်းတိုင်လုပ်ငန်း လုပ်ကိုင်သူ (၆) ဦးရှိပြီး နန့်ဖာလုံဈေးတွင်ဈေးဆိုင်များဖွင့်လှစ်၍ လက်လီ လက်ကားရောင်းချလျက်ရှိကြပါတယ်။ အရောင်းသွက်တဲ့ဖယောင်းတိုင်ကို အိန္ဒိယနိုင်ငံ မဏိပူရ်ပြည်နယ်၊ အာသံပြည်နယ်နဲ့ မိုးရေးမြို့များ နှင့်ကျေးရွာများက လာရောက်ဝယ်ယူလျှက်ရှိတယ်လို့သိရပါတယ်။
ဖယောင်းကုန်ကြမ်းမှာ တရုတ်ပြည်မှဖြစ်ပြီး မန္တလေးမှတစ်ဆင့်ဝယ်ယူရပါတယ်။ ၅၀ ကီလိုဝင် တစ်အိတ်မှာ ကျပ် ၇၃၀၀၀ ဖြစ်ပြီး သယ်ယူခ၊ လုပ်သားခအပါအဝင်တမူးအရောက် ဖယောင်းတစ်အိတ်ကို ကျပ် ၇၈၅၀၀ ဖြစ် ပါတယ်။ တစ်တန်ကို ကျပ် ၁၅၇၀၀၀၀ ကျပြီး ၁ ပိဝဿာကို ကျပ် ၂၄၀၀ နဲ့ ကျပ် ၂၅၀၀ ရှိပါ တယ်။ ဖယောင်းတိုင် လုပ်ငန်းရှင်များတစ်ဦးနဲ့တစ်ဦးထုတ်လုပ်မှုပုံစံခြင်းတူသော်လည်း အရွယ်အစားနဲ့ထုတ်ပိုးမှု မတူညီပါဘူး။ ဖောက်သည် များမှာယူတဲ့အပေါ်မူတည်ထုတ်လုပ်ကြရပါတယ်။ ရောင်းဈေးမှာအရွယ်အစားပေါ်မူတည်ပြီးဈေးနှုန်းကွဲပြားပါတယ်။ ဖယောင်း ၁ ပိဿာလျင် ထုတ်လုပ်မှုစရိတ်အနေဖြင့် (အလုပ်သမား၊ ထုတ်ပိုးခ၊ တံဆိပ်၊ မီးစာခ) ၃၀၀ ကျပ်နှင့် ဖယောင်းသား ၁ ပိဿာအပါအဝင် ကုန်ကျစရိတ်သည်၂၇၃၀ ရှိပြီး ရောင်းရငွေမှာ ၂၈၅၀ ဝန်းကျင်ရှိ၍ ၁ ပိဿာပေါ်တွင်အကြမ်းအမြတ် ၁၂၀ ကျပ်ခန့်ရှိကြောင်းသိရှိ ရပါတယ်။ ၁ တန်ပေါ်တွင်အကြမ်းအမြတ်ကျပ် ၇ သောင်းလောက် အမြတ်ရှိကြောင်းသိရပါတယ်။ လုပ်ငန်းရှင်တစ်ဦးလျင် လုပ်သား (၅) ယောက်မှ (၁၀) ယောက်အတွင်းရှိရာ ဖယောင်းထုတ်လုပ်မှု အတွက် ဒေသခံများအလုပ်အကိုင်ရရှိကြပြီး တစ်ရက်ပျမ်းမျှလုပ်ခ ကျပ် ၂၅၀၀ မှ ကျပ် ၃၀၀၀ ထိရရှိကြပါတယ်။ တမူးနယ်စပ်မှ ၂၀၁၁-၂၀၁၂ ဘဏ္ဍာနှစ်တွင် ဖယောင်းတိုင်တင်ပို့ရောင်းချမှုမှာ ကန်ဒေါ်လာ ၀ ဒသမ ၂၅၆ သန်းဖိုးရရှိခဲ့ပြီး ၊ ၂၀၁၂-၂၀၁၃ ဘဏ္ဍာနှစ် ပထမ (၆) လကာလမှာ ကန်ဒေါ်လာ ၀ ဒသမ ၁၆၅ သန်းဖိုး တင်ပို့ရောင်းချနိုင်ခဲ့ပါတယ်။ ယမန်နှစ်ကာလတူမှာ ကန်ဒေါ်လာ ၀ ဒသမ ၁၅၉ သန်းဖိုးတင်ပို့နိုင်ခဲ့တဲ့အတွက် ယခုနှစ်မှာ ကန်ဒေါ်လာ ၀ ဒသမ ၀၀၆ သန်းဖိုးပိုမိုတင်ပို့နိုင်ခဲ့ပါတယ်။ တမူးနယ်စပ်မြို့၌ အသေးစားကုန်ထုတ်လုပ်ငန်းတစ်ခုအပါအဝင်ဖြစ်တဲ့ ဖယောင်းထုတ်လုပ်မှု လုပ်ငန်းသည် ပို့ကုန်မြှင့်တင်ရေးအတွက် အထောက်အကူဖြစ်လျက်ရှိပါကြောင်းသိရပါတယ်။
အေးအေးထွေး (တမူး)
နီပေါနိုင်ငံက ပို့ကုန်ဝင်ငွေမြှင့်တင်ဖို့နဲ့ လယ်သမားတွေဝင်ငွေတိုးတက်စေဖို့ ရည်ရွယ်ပြီး လယ်ယာထွက်ကုန် (၆) မျိုးကို တိုးမြှင့်တင်ပို့ဖို့ စီစဉ်နေကြောင်း သိရတယ်။ ၎င်းပစ္စည်း (၆) မျိုးမှာ ဂျင်း၊ ပျားရည်၊ ပဲနီလေး၊ လ္ဘက်ခြောက် ၊ ဖာလာစေ့နဲ့ ခေါက်ဆွဲခြောက်များ ဖြစ်တယ်။ ၎င်းပစ္စည်းများကိုနိုင်ငံခြားဈေးကွက်တွေရဲ့ စံချိန်စံညွှန်းနဲ့ ကိုက်ညီအောင် စီမံထုတ်လုပ်သွားမှာ ဖြစ်ကြောင်း၊ တင်ပို့မှုမြှင့်တင်နိုင်ပါက လယ်သမားတွေရဲ့ဘဝကိုပါမြှင့်တင်နိုင်မှာဖြစ်ကြောင်း၊ ယခင်နှစ်က ၎င်းပစ္စည်းများ (ပျားရည်မပါ) တင်ပို့မှုမှ ဝင်ငွေမှာ နီပေါရူပီး ၈ ဒသမ ၈၆ ဘီလီယံရရှိခဲ့ကြောင်း ကုန်သွယ်မှုနဲ့ ပို့ကုန် မြှင့်တင်ရေးဗဟိုဌာနက ပြောကြားတယ်။ ၂၀၁၁ - ၁၂ ဘဏ္ဍာနှစ်အတွင်း ၎င်းပစ္စည်းငါးမျိုးအနက် ဝင်ငွေအမြင့် ဆုံးပစ္စည်းမှာ ဖာလာစေ့ဖြစ်ပြီး ဝင်ငွေအနေနဲ့ ရူပီး ၃ ဒသမ ၅၀ ဘီလီယံရရှိခဲ့တယ်။ ၎င်းနောက် ပဲနီလေးတင်ပို့မှုမှာ ဒုတိယအများဆုံးဖြစ်ပြီး နီပေါရူပီး ၂ ဒသမ ၆၈ ဘီလီယံရရှိခဲ့ကြောင်း ၊ လက်ဖက်ခြောက်တင်ပို့မှုမှ ရူပီး ၁ ဒသမ ၅၇ ဘီလီယံ၊ ခေါက်ဆွဲခြောက်တင်ပို့မှုမှ ရူပီး ၆၀၃ သန်းနဲ့ ဂျင်းတင်ပို့မှုမှ နီပေါရူပီး ၅၀၇ ဒသမ ၆ သန်း ရရှိခဲ့ကြောင်း သိရတယ်။ ကုန်သွယ်မှုနဲ့ ပို့ကုန်မြှင့်တင်ရေး ဗဟိုဌာနအနေနဲ့ ၎င်းပစ္စည်းတွေရဲ့ အရည်အသွေးတိုးတက်ရေးအတွက် လယ်သမားတွေနဲ့ ပို့ကုန်လုပ်ငန်းရှင်တွေကို သင်တန်းတွေ ဖွင့်လှစ်သင်ကြားပေးလျက်ရှိတယ်။ ဒါ့အပြင် ပိုးသတ်ဆေးများ၊ အန္တရယ်ဖြစ်စေတဲ့ အမှုန်အမွှားများ၊ရောဂါပိုး များပါဝင်မှုရှိ မရှိကို စမ်းသပ်ပေးဖို့ ဌာနရဲ့ ဓါတ်ခွဲခန်းကို အရည်အသွေးပိုမို ကောင်းမွန်စေဖို့ ပြုပြင် မွမ်းမံထားပြီး ဖြစ်ကြောင်း၊ လယ်သမားတွေကို ဓါတုဓါတ်မြေသြဇာတွေနဲ့ ပိုးသတ်ဆေးတွေမသုံးစွဲဖို့ တွန်းအားပေးလျက်ရှိပြီး အော်ဂဲနစ်စားနပ်ရိက္ခာများ ထုတ်လုပ်နိုင်ရေးအားပေးလျက်ရှိကြောင်း သိရတယ်။
Source: thehimalayantimes.com
ပပ
စားသောက်ကုန်ဘေးကင်းရေးနဲ့ပတ်သက်လို့ အာဆီယံကျွမ်းကျင်သူများအဖွဲ့ရဲ့ (၉ ) ကြိမ်မြောက် အစည်းအဝေးကို ဗီယက်နမ်နိုင်ငံ ဟနွိုင်းမြို့မှာ အောက်တိုဘာလ ၁၇ ရက်မှာ ဒေသတွင်း ကျန်းမာရေး စောင့်ရှောက်မှုကျွမ်းကျင်သူများ ပါဝင်တက်ရောက်ခဲ့ကြောင်းသိရပါတယ်။ ဖွင့်ပွဲအခမ်းအနားမှာ ကျန်းမာရေး ဒုတိယ ဝန်ကြီး Nguyen Thanh Long မှ ပြောကြားရာမှာ ယခုတက်ရောက်လာသူများအနေနဲ့ အာဆီယံအဖွဲ့ဝင်နိုင်ငံများ အလားတူ နိုင်ငံတကာမှ မိတ်ဆွေများနဲ့ စားသောက်ကုန်ဘေးကင်းရေး စီမံခန့်ခွဲမှုအတွေ့အကြုံများ၊ သတင်းအချက်အလက်များမျှဝေဖို့ အခွင့်အရေးရှိတဲ့ အခမ်းအနားဖြစ်တယ်လို့ဆိုပါတယ်။ အစားအသောက်နဲ့ စားသောက်ကုန်များမှတဆင့် ကူးပြောင်းတဲ့ရောဂါနဲ့ စားသောက်ကုန်မှား သန့်ရှင်းမှုမရှိခြင်းဟာ ကမ္ဘာ့လူ့အဖွဲ့အစည်း ကျန်းမာရေးကိုခြိမ်းခြောက်လျက်ရှိရာ အထူးသဖြင့် နိုင်ငံတကာခရီးသွားနဲ့ စားသောက်ကုန်ရောင်းဝယ်ပွဲများ တိုးတက်လာတဲ့ အသိုင်းအဝိုင်းမှာဖြစ်ပေါ်စေပါတယ်။ ဒါကြောင့် နိုင်ငံတစ်ခုချင်း စီမှာ စားသောက်ကုန်ဘေးကင်းရေးကြီးကြပ်မှုတွေ ခိုင်မာအောင်နဲ့ဒေသတွင်းနဲ့ နိုင်ငံတကာစံချိန်စံညွှန်းများနဲ့ လိုက်လျောညီထွေရှိမယ့် မှန်ကန်တဲ့စံနှုန်းတစ်ခုတည်ဆောက်ခြင်း၊ ဥပဒေနဲ့အညီ အထောက်အထားများ တည်ဆောက်ခြင်းဖြင့် စားသောက်ကုန်ဘေးကင်းရေး ချိုးဖောက်မှုများကို တိုက်ခိုက်ခြင်းကို အာဆီယံအသိုက် အဝန်းမှာအတူတကွ ပူးပေါင်းဆောင်ရွက်သင့်တယ်လို့ဆိုပါတယ်။
၃ ရက်ကြာပြုလုပ်တဲ့ အစည်းအဝေးအတွင်း အာဆီယံအဖွဲ့ဝင်နိုင်ငံများမှ ကျွမ်းကျင်သူများဟာ စားသောက်ကုန်ဘေးကင်းရေးနဲ့ပတ်သက်တဲ့ အဆိုပြုချက်များ မည်သို့သတိပြုသင်ြ့ခင်း၊ နိုင်ငံတကာအဆင့် စားသောက်ကုန်ဘေးကင်းရေးစနစ်တည်ဆောက်ခြင်း ဒေသတွင်းစားသုံးသူများကို အရည်အသွေးကောင်း၊ ဘေးကင်းတဲ့စားသောက်ကုန်များရရှိဖို့ အကူအညီပေးခြင်းစတာတွေကို ဆွေးနွေးမယ်လို့သိရပါတယ်။
ယမင်းခင်
Source: VOU
မြန်မာ့လယ်ယာထွက်ကုန်ပစ္စည်းများကို ပြည်ပသို့တင်ပို့ရင်းပို့ကုန်အမယ်သစ်များကိုလည်း ဈေးကွက်ထိုးဖောက်ဝင်ရောက် နိုင်ရေး
ကြိုးပမ်းလျက်ရှိရာ ယခင်က ချင်းအား ချင်းစို၊ ချင်းခြောက်၊ ချင်းခြောက်အလွှာပါးနှင့် ချင်းခြောက်(အမှုန့်) ဟူ၍ ပြည်ပသို့ တင်ပို့လျက်ရှိနေရာမှ ယခုအခါ မြန်မာနိုင်ငံရှိ ကုမ္ပဏီတစ်ခုမှ အမယ်သစ် ချင်းနက် ခြောက် ၁၀၀၀ ကီလိုဂရမ်အား ဂျပန်နိုင်ငံသို့တင်ပို့ရန် ပို့ကုန်လိုင်စင်လျှောက်ထားခဲ့ရာ ကုန်သွယ်ရေးညွှန်ကြားမှုဦးစီးဌာနမှ ပို့ကုန်လိုင်စင် ထုတ် ပေးထားပြီးဖြစ် ကြောင်း သိရှိရပါသည်။ ချင်းနက်မှာ ရှမ်းပြည်နယ်တောင်ပိုင်းတွင် စိုက်ပျိုးထွက်ရှိပြီး ဒေသအခေါ် တိမ်ပြာနနွင်းဟု ခေါ်ဝေါ် ကြောင်း သိရှိရပါသည်။ ချင်းနက်ဆိုသော်လည်း ချင်းကဲ့သို့ ပူစပ်သောအရာမရှိဘဲ နနွင်းအရသာရှိပြီး ချင်းနက်အား ဝါးစားပါက သွားများကိုပင် မည်းနက်စေကြောင်း သိရှိရပါသည်။ ချင်းနက်အပင်မျိုးနွယ်မှာ ချင်းကဲ့သို့အရသာမရှိသော်လည်း နနွင်းတက်ကဲ့သို့ သေးသွယ်ခြင်းမရှိဘဲ ချင်းဥမအရွယ်ရှိသောကြောင့် ချင်းနက်ဟု ခေါ်ဝေါ်သတ်မှတ်ခြင်းဖြစ်ကြောင်း လေ့လာသိရှိရပါသည်။ အရသာနှင့် အပင်ပုံစံကိုအစွဲပြုပြီးဒေသတွင်း တိမ်ပြာနနွင်းဟု ခေါ်ဆိုကြောင်း သိရသည်။
မြန်မာနိုင်ငံတွင် ချင်းနက်ကို ရှမ်းပြည်နယ်တောင်ပိုင်းတွင် ဒေသသုံး တိုင်းရင်းဆေးဖော်စပ်စားသုံးရန် စိုက်ပျိုးမှု အနည်းငယ် သာရှိပြီး ပိဿာချိန် ၃၀၀၀၀ ခန့်သာ စုဆောင်းဝယ်ယူနိုင်ကြောင်းနှင့် ဒေသအတွင်း အမှုန့်ကြိတ်ကာ ပျားရည်နှင့်ရောစပ်ပြီး အားဆေးအဖြစ်သုံးစွဲကြကြောင်း၊ ပြည်တွင်းပြည်ပအမှာရှိပါက စိုက်ပျိုးပေးနိုင်ကြောင်း သိရှိရပါသည်။ ထိုင်းနိုင်ငံတွင် ချင်းနက် FOB တစ်ကီလိုဂရမ်ဈေးမှာ အမေရိကန်ဒေါ်လာ ရှစ်ဒေါ်လာဖြစ်သဖြင့် သင့်တင့်ကောင်းမွန်သည့် ဈေးနှုန်းရရှိကြောင်း၊ ဂျပန်နိုင်ငံတွင် ချင်းနက်အား ပရဆေးဖော်စပ်ရန်နှင့် အလှကုန်လုပ်ငန်း များတွင် အသုံးပြုမည်ဖြစ်ကြောင်း သိရှိရပါသည်။ မြန်မာ့ချင်းနက်ကို ဂျပန်နိုင်ငံမှနှစ်သက်၍ ဆက်လက်ဝယ်ယူသည့်အပြင် အခြားနိုင်ငံများမှ ဝယ်လက် (Buyer) များရှာဖွေ နိုင်ပါက စိုက်ပျိုးထုတ်လုပ်ပေးနိုင်မည့် အမယ်တစ်မျိုးဖြစ်သည့် အတွက်ဈေး ကွက်သစ်များတိုးတက်ရရှိရေး ပို့ကုန်လုပ်ငန်းရှင် များမှ ရှာဖွေနိုင်ပါက နိုင်ငံခြားဝင်ငွေ ထိရောက်စွာ ရှာဖွေပေးနိုင်သည့် အမယ်သစ်ပို့ကုန် တစ်မျိုး ဖြစ်လာနိုင်ပါသည်။ တောင်သူများအနေဖြင့်လည်း ဈေးကွက်အခွင့်အလမ်း ရရှိနိုင်မည်ဖြစ်သဖြင့် ချင်းနက်အား ယခုထက်ပိုမိုတိုးချဲ့စိုက်ပျိုးနိုင်ရေး ကြိုတင်ပြင်ဆင်သင့်ပါကြောင်း သတင်းကောင်းပါလိုက်ရပါသည်။
စန္ဒာထွန်း (ပို့ကုန်)
Pages
