Department of Trade

နေပြည်တော်၊ ဒီဇင်ဘာလ ၁၅

   မူပိုင်ခွင့်ဦးစီးဌာနရှိ ဝန်ထမ်းများအား မူပိုင်ခွင့်ဘာသာရပ်အတွက် စွမ်းရည်ပြည့်ဝပြီး ဘာသာရပ်ဆိုင်ရာလုပ်ငန်းများကို ကောင်းမွန်လွယ်ကူစွာဆောင်ရွက်နိုင်ရန် ရည်ရွယ်၍ “မူပိုင်ခွင့်ဆိုင်ရာစွမ်းရည်ပြိုင်ပွဲ”ကို ဒီဇင်ဘာလ ၁၅ ရက်နေ့၊ နံနက် ၉:၃၀ နာရီအချိန်တွင် နေပြည်တော်ရှိ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မူပိုင်ခွင့်ဦးစီးဌာန၊ ရုံးအမှတ်(၅၂)၊ အစည်းအဝေးခန်းမတွင် ကျင်းပခဲ့ရာ မူပိုင်ခွင့်ဦးစီးဌာနမှ ညွှန်ကြားရေးမှူးချုပ်၊ ညွှန်ကြားရေးမှူးများနှင့် မူပိုင်ခွင့်ဦးစီးဌာနမှ အရာထမ်း၊ အမှုထမ်းများတက်ရောက်ခဲ့ကြပါသည်။

   မူပိုင်ခွင့်ဆိုင်ရာစွမ်းရည်ပြိုင်ပွဲတွင် တင်ပြမှုစွမ်းရည်ပြိုင်ပွဲ(Presentation Skill)နှင့် မူပိုင်ခွင့်ဆိုင်ရာ စကားရည်လုပွဲ(IP Debate) စသည့် စွမ်းရည်(၂)မျိုးပါဝင်ယှဉ်ပြိုင်မည်ဖြစ်ပြီး ပြိုင်ပွဲ နှင့်ပတ်သက်၍ လိုက်နာရမည့်စည်းကမ်းချက်များကို ညွှန်ကြားရေးမှူး ဒေါက်တာနွယ်ရီဝင်းက ရှင်းလင်းဆွေးနွေးခဲ့ပါသည်။ ထို့နောက် တင်ပြမှုစွမ်းရည်ပြိုင်ပွဲအတွက်ဌာနခွဲများမှပြိုင်ပွဲဝင် (၆)ဦးက သက်ဆိုင်ရာခေါင်းစဉ်များအလိုက် ပါဝင်ယှဉ်ပြိုင်ခဲ့ကြပြီး မူပိုင်ခွင့်ဆိုင်ရာစကားရည်လုပွဲ (IP Debate) ပြိုင်ပွဲအတွက် စီးပွားရေးဖွံဖြိုးတိုးတက်စေရန် စက်မှုပစ္စည်းမူပိုင်ခွင့်၏ အရေးပါမှု နှင့် စီးပွားရေးဖွံဖြိုးတိုးတက်စေရန် စာပေနှင့်အနုပညာမူပိုင်ခွင့်၏ အရေးပါမှုခေါင်းစဉ်များဖြင့် ပြိုင်ပွဲဝင်မည့်အဖွဲ့နှစ်ဖွဲ့မှ ယှဉ်ပြိုင်ဆွေးနွေးခဲ့ကြပါသည်။

   ပြိုင်ပွဲဝင်များအတွက် စိစစ်အကဲဖြတ်အမှတ်ပေးခြင်းနှင့် ဆုရရှိသူများရွေးချယ်ခြင်းကို မူပိုင်ခွင့်ဦးစီးဌာနမှ ညွှန်ကြားရေးမှူးများက စိစစ်အကဲဖြတ် ဆောင်ရွက်ခဲ့ကြပြီး သက်ဆိုင်ရာ စွမ်းရည်ပြိုင်ပွဲအလိုက် ဆုများကို ရွေးချယ်ခဲ့ကာ အခမ်းအနားကို ရုတ်သိမ်းခဲ့ကြောင်း သတင်း ရရှိပါသည်။

နေပြည်တော်၊ ဒီဇင်ဘာလ ၁၁

   ဟောင်ကောင်အထူးအုပ်ချုပ်ရေးဒေသ၌ ၂၀၂၃ ခုနှစ်၊ ဒီဇင်ဘာလ ၇ ရက်နေ့မှ ၈ ရက်နေ့အထိကျင်းပပြုလုပ်သည့် (၁၃)ကြိမ်မြောက်အာရှဒေသတွင်းမူပိုင်ခွင့်နှင့်စပ်လျဉ်းသည့်စီးပွားရေးဆိုင်ရာဖိုရမ်နှင့် အာဆီယံအဖွဲ့ဝင်နိုင်ငံများအတွက် ပူးတွဲကျင်းပမည့်ဆွေးနွေးပွဲသို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မူပိုင်ခွင့်ဦးစီးဌာနမှဒုတိယညွှန်ကြားရေးမှူးချုပ် ဦးဆောင်သော မြန်မာကိုယ်စားလှယ်အဖွဲ့တက်ရောက်ခဲ့ပါသည်။

   အာဆီယံမူပိုင်ခွင့်ရုံးများအကြား အမှတ်တံဆိပ်မှတ်ပုံတင်ခြင်းဆိုင်ရာနောက်ဆုံးဖြစ်ပေါ် တိုးတက်မှုများ၊ အမှတ်တံဆိပ်များ၏ တန်ဖိုးကိုဖော်ထုတ်နိုင်ရေးအတွက် ဦးစားပေးအစီအစဉ် နှင့် လက်ဦးမှုရယူနိုင်ရေးအတွက် လမ်းဖွင့်ပေးမှုများကို  စုပေါင်းဆွေးနွေးခြင်းဖြင့် အာဆီယံနိုင်ငံများအတွင်း စံထားရမည့်မူပိုင်ခွင့်စင်္ကြန်တစ်ခုတည်ဆောက်နိုင်ရေးအတွက် ရည်ရွယ်၍အဆိုပါဆွေးနွေးပွဲကို ကျင်းပခြင်းဖြစ်ပါသည်။

   ဆွေးနွေးပွဲတွင် မူပိုင်ခွင့်ဦးစီးဌာန၊ ဒုတိယညွှန်ကြားရေးမှူးချုပ်က မြန်မာနိုင်ငံ၏ မူပိုင်ခွင့်ဥပဒေများအပေါ် အကောင်အထည်ဖော်မှု အခြေအနေများ၊ အမှတ်တံဆိပ် မှတ်ပုံတင်ခြင်းဆိုင်ရာ နောက်ဆုံးတိုးတက်မှုအခြေအနေများကို တင်ပြဆွေးနွေးခဲ့ပြီး ဟောင်ကောင်အထူး အုပ်ချုပ်ရေးဒေသနှင့် အာဆီယံအဖွဲ့ဝင်နိုင်ငံများမှ မူပိုင်ခွင့်ဆိုင်ရာ နောက်ဆုံးဖြစ်ပေါ်တိုးတက် မှုအခြေအနေများ၊ အာဆီယံဒေသအတွင်း အမှတ်တံဆိပ်များ၏ တန်ဖိုးဖော်ထုတ်ခြင်းဆိုင်ရာ အကြောင်းအရာများ၊ ဟောင်ကောင်နှင့်အာဆီယံဒေသအတွင်း brand အမှတ်တံဆိပ်များအား ခွင့်ပြုချက်ဖြင့် လုပ်ကိုင်ခွင့်ပေးခြင်းဆိုင်ရာ လုပ်ငန်းစဉ်များကို case study များဖြင့် ဆွေးနွေးခဲ့ကြပါကြောင်း သတင်းရရှိပါသည်။

နေပြည်တော်၊ ဒီဇင်ဘာလ ၁

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မူပိုင်ခွင့်ဦးစီးဌာန၏ တာဝန်ထမ်းဆောင် နေသော အရာထမ်း၊ အမှုထမ်းများ အင်္ဂလိပ်စာစွမ်းရည်မြင့်မားတိုးတက်စေရန်ရည်ရွယ်၍ “အင်္ဂလိပ်ဘာသာစကားကျွမ်းကျင်မှုစွမ်းရည်ပြိုင်ပွဲ (၁/၂၀၂၃)” ကို ဒီဇင်ဘာလ ၁ ရက်နေ့၊ နံနက် ၉ နာရီအချိန်တွင် နေပြည်တော်ရှိ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မူပိုင်ခွင့်ဦးစီးဌာန၊ ရုံးအမှတ်(၅၂)ရှိ အစည်းအဝေးခန်းမတွင် ကျင်းပခဲ့ရာ ညွှန်ကြားရေးမှူးချုပ် ဒေါက်တာမိုးမိုးသွယ်က အဖွင့်အမှာစကားပြောကြားခဲ့သည်။

   အဆိုပါအခမ်းအနားသို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မူပိုင်ခွင့်ဦးစီးဌာန ဒုတိယညွှန်ကြားရေးမှူးချုပ်၊ ညွှန်ကြားရေးမှူးများ၊ အကဲဖြတ်ဒိုင်လူကြီးများနှင့် မူပိုင်ခွင့်ဦးစီးဌာနမှ အရာထမ်းအမှုထမ်းများ တက်ရောက်ကြသည်။

   ရှေးဦးစွာ ညွှန်ကြားရေးမှူးချုပ်က အဖွင့်အမှာစကားပြောကြားရာ၌ ယခုပြိုင်ပွဲကို ကျင်းပရခြင်းရဲ့ ရည်ရွယ်ချက်ကတော့ ဝန်ထမ်းများကို အင်္ဂလိပ်ဘာသာစကားကျွမ်းကျင်မှု တိုးတက်လာပြီး မူပိုင်ခွင့်ဘာသာရပ်ဆိုင်ရာလုပ်ငန်းများတွင် နိုင်ငံတကာနှင့်ပြောဆိုဆက်ဆံရာ၌ ကောင်းမွန်လွယ်ကူစွာ ဆက်သွယ်ဆောင်ရွက်နိုင်ရေးတို့အတွက် စွမ်းဆောင်ရည်မြှင့်တင်နိုင်ရန် ရည်ရွယ်၍ ယခုပြိုင်ပွဲကို ကျင်းပပြုလုပ်ရခြင်းဖြစ်ပါကြောင်း၊ အင်္ဂလိပ်ဘာသာစကားဟာ နိုင်ငံတကာမှာ ကျယ်ပြန့်စွာအသုံးပြုနေတဲ့ ဘာသာစကားတစ်ခုဖြစ်တဲ့အတွက် ဝန်ထမ်းများ အနေဖြင့် အင်္ဂလိပ်ဘာသာစကားကို ကျွမ်းကျင်ပိုင်နိုင်အောင် သင်ယူတတ်မြောက်ထားသင့်ပါကြောင်း၊  နိုင်ငံတကာမှ ဖိတ်ခေါ်သည့် ပညာသင်ဆုများ၊ အလုပ်ရုံဆွေးနွေးပွဲများ၊ သင်တန်းများစွာကို တက်ရောက်ရမည့်အခွင့်လမ်းများစွာရှိတဲ့ဌာနဖြစ်သည့်အတွက် ဝန်ထမ်းများကို အင်္ဂလိပ်ဘာသာစကားနှင့်ပတ်သက်၍ အားနည်းမှုမရှိစေလိုကြောင်း၊ နိုင်ငံတကာနှင့် ရင်ဘောင်တန်း၍ ပြောဆိုဆက်ဆံလုပ်ကိုင်ဆောင်ရွက်ရမည့် လုပ်ငန်းကိစ္စရပ်များစွာရှိလာမှာ ဖြစ်တဲ့အတွက် အင်္ဂလိပ်ဘာသာစကားကျွမ်းကျင်ပိုင်နိုင်ဖို့ လိုအပ်ပါကြောင်းပြောကြားခဲ့သည်။

   အင်္ဂလိပ်စာဘာသာစကားစွမ်းရည်ပြိုင်ပွဲတွင် ပြိုင်ပွဲဝင်များကို မူပိုင်ခွင့်ဦးစီးဌာနမှ လစဉ်ကျင်းပသော အင်္ဂလိပ်စာရေးဖြေစာမေးပွဲနှင့် Speaking Test စစ်ဆေးခြင်းတို့တွင် အမှတ်အများဆုံး ရရှိထားသူများအား ရွေးချယ်ထားခြင်းဖြစ်ပါကြောင်း၊ အဆိုပါ ပြိုင်ပွဲဝင် များသည် ပြိုင်ပွဲဝင်ခေါင်းစဉ်များဖြစ်သည့် (၁) IP and Innovation၊ (၂) IP and Youth နှင့်  (၃) IP and Economic Development ခေါင်းစဉ်(၃)ခုအား မဲနှိုက်ရွေးချယ်ကာ မိမိကျရာခေါင်းစဉ်(၁)ခုကို ယှဉ်ပြိုင်ကြရမှာဖြစ်ကြောင်း၊ ပြိုင်ပွဲ၏စိစစ်အကဲဖြတ်အမှတ်ပေးခြင်းနှင့် ဆုရရှိသူများရွေးချယ်ခြင်းကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မူပိုင်ခွင့်ဦးစီးဌာနမှ ဒုတိယညွှန်ကြားရေးမှူးချုပ်နှင့် ဦးစီးဌာနအသီးသီးမှ အရာထမ်းများဖြင့် စိစစ်အကဲဖြတ်ဆောင်ရွက်သွားမည်ဖြစ်ပါကြောင်း ပြောကြားခဲ့သည်။

   အင်္ဂလိပ်ဘာသာကျွမ်းကျင်မှုစွမ်းရည်ပြိုင်ပွဲ အမှတ်စဉ် (၁/၂၀၂၃)တွင် ဌာနခွဲအသီးသီးမှ အရာထမ်း၊ အမှုထမ်း (၉) ဦးက ပါဝင်ယှဉ်ပြိုင်ခဲ့ပြီး ပထမဆု၊ ဒုတိယဆု၊ တတိယဆုနှင့် နှစ်သိမ့်ဆုတို့ကို အသီးသီးရွေးချယ်ကာ အခမ်းအနားကို ရုပ်သိမ်းခဲ့ကြောင်း သတင်းရရှိသည်။