Department of Trade

နေပြည်တော်၊  စက်တင်ဘာလ ၂၇

   ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ နေပြည်တော်အတွင်းရှိ အသေးစား၊ အငယ်စား၊ အလတ်စားစီးပွားရေးလုပ်ငန်းရှင်များအတွက် ရည်ရွယ်၍ကျင်းပသည့် စက်မှုဒီဇိုင်းမူပိုင်ခွင့် ဆိုင်ရာအသိပညာပေးဆွေးနွေးပွဲကို စက်တင်ဘာလ ၂၇ ရက်နေ့၊   နံနက် ၁၀ နာရီအချိန်တွင် စီးပွားရေး နှင့်ကူးသန်းရောင်းဝယ်ရေးဝန်ကြီးဌာန၊ မူပိုင်ခွင့်ဦးစီးဌာန၊ ရုံးအမှတ် (၅၂)၊ အစည်းအဝေးခန်းမ၌ Virtual စနစ်ဖြင့်ကျင်းပရာ မူပိုင်ခွင့်ဦးစီးဌာနမှ ဒုတိယညွှန်ကြားရေးမှူးချုပ် ဒေါက်တာနှင်းနွယ်အေး က အဖွင့်အမှာစကားပြောကြားခဲ့သည်။

    ဆွေးနွေးပွဲတွင် မူပိုင်ခွင့်ဦးစီးဌာန၊ ဒုတိယညွှန်ကြားရေးမှူးချုပ်က အဖွင့်အမှာစကားပြောကြားရာ၌ စက်မှုဒီဇိုင်းမူပိုင်ခွင့်နှင့်စပ်လျဉ်းပြီး ဥပဒေ၊ နည်းဥပဒေပါ သတ်မှတ်ချက်များနှင့် စက်မှုဒီဇိုင်းမူပိုင်ခွင့် ရယူလိုပါက မှတ်ပုံတင်လျှောက်ထားနိုင်မည့်နည်းလမ်းများ၊ ကန့်သတ်ချက်များ၊ စက်မှုဒီဇိုင်းမှတ်ပုံ တင်ခြင်းဖြင့် ရရှိမည့်အကျိုးကျေးဇူးများအကြောင်းကို အများပြည်သူသိရှိစေရန်အတွက် ယခုလို အသိပညာပေးဆွေးနွေးပွဲ ကျင်းပရခြင်းဖြစ်ပါကြောင်း၊ စက်မှုဒီဇိုင်းမူပိုင်ခွင့်ဥပဒေ၊ စက်မှုဒီဇိုင်း မူပိုင်ခွင့်နည်းဥပဒေများကို ပြဋ္ဌာန်းခဲ့ပြီးဖြစ်သော်လည်း မူပိုင်ခွင့်စနစ်တစ်ရပ်ကို ဖော်ဆောင်ရာတွင် အဆိုပါ ဥပဒေ၊ နည်းဥပဒေများကို အများပြည်သူ လိုက်နာကျင့်သုံးဖို့ရန်လည်း လိုအပ်ပါကြောင်း၊  အများ ပြည်သူများအနေဖြင့် မူပိုင်ခွင့်၏ အနှစ်သာရနှင့် အကျိုးကျေးဇူးများကို သိရှိထားရန် လိုအပ်သလို မူပိုင်ခွင့်ဥပဒေက ပေးအပ်သည့်အခွင့်အရေးနှင့် ရပိုင်ခွင့်များကိုလည်း ရရှိရန်အတွက် သတ်မှတ်ချက် များ၊ လျှောက်ထားချက်များနှင့်အညီ လျှောက်ထားရန်လိုအပ်ပါကြောင်း၊ စီးပွားရေးလုပ်ငန်းရှင် များအနေဖြင့် စက်မှုဒီဇိုင်းဥပဒေပါ ဖော်ပြချက်များကို သိရှိထားမည်ဆိုလျှင် ကိုယ်တိုင်ဖန်တီးပြုလုပ် ထားသည့်အရာများ သို့မဟုတ် ဈေးကွက်တွင် ကိုယ်တိုင်ထုတ်လုပ် ဖြန့်ဖြူးရောင်းချနေသည့် ထုတ်ကုန်ပစ္စည်းများကို တစ်ပါးသူ ပုံတူကူးချခြင်း၊ အတုပြုလုပ်ခြင်း၊ ရောင်းချခြင်း၊ မိမိပစ္စည်းကို နာမည်ပျက်အောင် ပုံစံတူ အရည်အသွေးညံ့သည့် ပစ္စည်းများထုတ်လုပ်ပြီး ထင်ယောင်ထင်မှားဖြစ် အောင်ပြုလုပ်ခြင်းများကို စက်မှုဒီဇိုင်းမူပိုင်ခွင့်ဥပဒေနှင့် အကာအကွယ်ရယူပြီး တားဆီးနိုင်မည်ဖြစ်ပါကြောင်း၊ မူပိုင်ခွင့်ကို ထိပါးချိုးဖောက်သူများကိုလည်း ဥပဒေအရ ထိထိရောက်ရောက်အရေးယူ နိုင်မည်ဖြစ်ပြီး မိမိတို့၏ အခွင့်အအရေးကိုလည်း ကာကွယ်နိုင်မည်ဖြစ်ပါကြောင်း ပြောကြားခဲ့သည်။

   ဆက်လက်၍ စက်မှုဒီဇိုင်းမူပိုင်ခွင့်ဌာနခွဲမှ ဘာသာရပ်တာဝန်ခံ ညွှန်ကြားရေးမှူး ဒေါက်တာ ခင်စန္ဒာဝင်းက စက်မှုဒီဇိုင်းမူပိုင်ခွင့်ဆိုင်ရာ သိကောင်းစရာများနှင့် စပ်လျဉ်း၍ ရှင်းလင်းဆွေးနွေးခဲ့ပြီး၊ အသိပညာပေးဆွေးနွေးပွဲသို့ တက်ရောက်လာကြသူများက သိရှိလိုသည်များကို မေးမြန်းခြင်းများအပေါ် ဘာသာရပ်တာဝန်ခံ ညွှန်ကြားရေးမှူးက ပြန်လည်ရှင်းလင်းဖြေကြားခဲ့ပြီး၊ ဆွေးနွေးပွဲသို့ မူပိုင်ခွင့် ဦးစီးဌာန ညွှန်ကြားရေးမှူးများနှင့် တာဝန်ရှိသူများ၊ စက်မှုကြီးကြပ်ရေးနှင့်စစ်ဆေးရေးဦးစီးဌာနမှ တာဝန်ရှိသူများ၊ ဧရာဝတီတိုင်းဒေသကြီးနှင့် တနင်္သာရီတိုင်းဒေသကြီး အတွင်းရှိ အသေးစား၊ အငယ်စား၊ အလတ်စားစီးပွားရေးလုပ်ငန်းရှင်များ စုစုပေါင်း(၇၅)ဦး တက်ရောက်ကြကြောင်းသတင်းရရှိသည်။

နေပြည်တော်၊  စက်တင်ဘာလ ၁၉

   တီထွင်မှုမူပိုင်ခွင့်ဆိုင်ရာ အသိပညာပေးဆွေးနွေးပွဲကို စက်တင်ဘာလ ၁၉ ရက်နေ့၊  နံနက် ၁၀ နာရီအချိန်တွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မူပိုင်ခွင့်ဦးစီးဌာန၊ ရုံးအမှတ် (၅၂)၊ အစည်းအဝေးခန်းမ၌ Virtual စနစ်ဖြင့်ကျင်းပရာ မူပိုင်ခွင့်ဦးစီးဌာနမှ ညွှန်ကြားရေးမှူးချုပ် ဒေါက်တာမိုးမိုးသွယ်က အဖွင့်အမှာစကားပြောကြားခဲ့သည်။

   အဆိုပါအသိပညာပေးဆွေးနွေးပွဲတွင် မူပိုင်ခွင့်ဦးစီးဌာနမှ ညွှန်ကြားရေးမှူးများနှင့် တာဝန် ရှိသူများ၊ စက်မှုကြီးကြပ်ရေးနှင့်စစ်ဆေးရေးဦးစီးဌာနမှ အရာထမ်းကိုယ်စားလှယ်များ၊ တိုင်းဒေသကြီး၊ ပြည်နယ်နှင့် ပြည်ထောင်စုနယ်မြေ နေပြည်တော်အတွင်းရှိ အသေးစား၊ အငယ်စား၊ အလတ်စား စီးပွားရေးလုပ်ငန်းရှင်များ၊ ပြည်ထောင်စုသမ္မတမြန်မာနိုင်ငံကုန်သည်များနှင့်စက်မှုလက်မှုလုပ်ငန်းရှင်များအသင်းချုပ်(UMFCCI)၊ မန္တလေးတိုင်းဒေသကြီးကုန်သည်များနှင့်စက်မှုလက်မှုလုပ်ငန်းရှင်များအသင်း(MRCCI) အောက်ရှိညီနောင်အသင်းများမှ ကိုယ်စားလှယ်များ၊ စုစုပေါင်း ( ၁၀၀ ) ဦးခန့် တက်ရောက်ခဲ့ကြသည်။

    ဆွေးနွေးပွဲတွင် မူပိုင်ခွင့်ဦးစီးဌာန၊ ညွှန်ကြားရေးမှူးချုပ်က အဖွင့်အမှာစကားပြောကြားရာ၌ ၂၀၁၉ ခုနှစ်၊ မတ်လ ၁၁ ရက်နေ့တွင် အတည်ပြုပြဌာန်းခဲ့သည့် တီထွင်မှုမူပိုင်ခွင့်ဥပဒေသည် ၂၀၂၄ ခုနှစ်၊ မေလ ၃၁ ရက်နေ့မှာ အာဏာသက်ဝင်နိုင်ခဲ့ပြီးဖြစ်၍ တီထွင်မှုမူပိုင်ခွင့်ပိုင်ရှင်များအနေဖြင့် မိမိတို့၏တီထွင်ဖန်တီးမှုများကို တီထွင်မှုမူပိုင်ခွင့်ဥပဒေနှင့် အကာအကွယ်ရယူထားနိုင်မည်ဖြစ်ကြောင်း၊ အသေးစား၊ အငယ်စား၊ အလတ်စားစီးပွားရေးလုပ်ငန်းရှင်များအနေဖြင့် တီထွင်မှုမူပိုင်ခွင့်ဥပဒေနှင့်စပ်လျဉ်းသည့် အသိပညာများသိရှိနိုင်ခြင်း၊ တီထွင်ဖန်တီးမှုများကို အကာအကွယ်ရယူနိုင်ခြင်းနှင့် တီထွင်မှုမူပိုင်ခွင့်အကာအကွယ်ရယူခြင်းဖြင့် မိမိတို့လုပ်ငန်းများ ဖွံ့ဖြိုးတိုးတက်စေရန် ဆောင်ရွက်နိုင်မည်ဖြစ်ပါကြောင်း၊ နိုင်ငံ၏ လိုအပ်ချက်အပေါ်မူတည်၍ စီးပွားရေးကဏ္ဍဖွံ့ဖြိုးတိုးတက်မှုအတွက် လိုအပ်သည့်နည်းပညာများကို အပြည့်အဝထိရောက်စွာ အသုံးပြုနိုင်ရန်နှင့် ပြည်တွင်း ထုတ်လုပ်နိုင်မှုစွမ်းအား မြှင့်တင်နိုင်ရန်အတွက် အသေးစားတီထွင်မှုမူပိုင်ခွင့်ကို အကာအကွယ်ပေးခြင်းနှင့်စပ်လျဉ်း၍ တီထွင်မှုမူပိုင်ခွင့်ဥပဒေတွင် ထည့်သွင်းဖော်ပြထားပြီးဖြစ်ရာ နိုင်ငံအတွက်အသုံးချနိုင်ပါက တိုင်းပြည်နှင့် ပြည်သူလူထုအတွက် အကျိုးကျေးဇူးများစွာရရှိမည် ဖြစ်ပါကြောင်း၊ တီထွင်ဖန်တီးသူလက်ရာရှင်များနှင့် ပြည်သူများအား တီထွင်မှုမူပိုင်ခွင့်ဆိုင်ရာအသိပညာဗဟုသုတ များ ရရှိစေရေးအတွက်ရည်ရွယ်၍ အသိပညာပေးဆွေးနွေးပွဲများကို ဆောင်ရွက်ခြင်းဖြစ်ပါကြောင်း ပြောကြားခဲ့ပါသည်။

   ဆက်လက်၍ တီထွင်မှုမူပိုင်ခွင့်ဌာနခွဲမှ ဘာသာရပ်တာဝန်ခံ ညွှန်ကြားရေးမှူး ဒေါက်တာပွင့်ဖြိုးဝင်းက တီထွင်မှုမူပိုင်ခွင့်ဥပဒေ၊ တီထွင်မှုမူပိုင်ခွင့်ဆိုင်ရာ သိကောင်းစရာများနှင့် စပ်လျဉ်း၍ ရှင်းလင်းဆွေးနွေးခဲ့ပြီး၊ အသိပညာပေးဆွေးနွေးပွဲသို့ တက်ရောက်လာကြသူများက သိရှိလိုသည်များကို မေးမြန်းခြင်းများအပေါ် ဘာသာရပ်တာဝန်ခံ ညွှန်ကြားရေးမှူးက ပြန်လည်ရှင်းလင်းဖြေကြားခဲ့ပြီး ဆွေးနွေးပွဲကို ရုပ်သိမ်းခဲ့ကြောင်း သတင်းရရှိသည်။

နေပြည်တော်၊ စက်တင်ဘာလ ၂

          ဘရူနိုင်းဒါရုဆလမ်နိုင်ငံ၊ ဘန်ဒါဆီရီဘီဂါဝန်မြို့တွင် ၂၀၂၄ ခုနှစ်၊ စက်တင်ဘာလ ၂ ရက်နေ့မှ ၅ ရက်နေ့အထိ ကျင်းပပြုလုပ်သည့် “(၇၃)ကြိမ်မြောက် အာဆီယံမူပိုင်ခွင့်ဆိုင်ရာ ပူးပေါင်းဆောင်ရွက်ရေး လုပ်ငန်းအဖွဲ့အစည်းအဝေး (73rd ASEAN Working Group on Intellectual Property Cooperation -AWGIPC) သို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မူပိုင်ခွင့်ဦးစီးဌာနမှ ဒုတိယညွှန်ကြားရေးမှူးချုပ် တက်ရောက်လျက်ရှိပါသည်။

          အဆိုပါအစည်းအဝေးတွင်  အာဆီယံဒေသတွင်း နိုင်ငံများအကြား မူပိုင်ခွင့်နှင့်စပ်လျဉ်း၍  ဖြစ်ပေါ်တိုးတက်လျက်ရှိသော ကိစ္စရပ်များ၊ မူပိုင်ခွင့်ဆိုင်ရာ သတင်းအချက်အလက်များအား ဖလှယ်ခြင်း၊  အာဆီယံမူပိုင်ခွင့်ဆိုင်ရာ အဓိကဦးစားပေး ကဏ္ဍများကို သတ်မှတ်ဖော်ထုတ်ခြင်း၊ ကနဦး လေ့လာမှုများ အပြီးသတ်ဆောင်ရွက်ခြင်း၊ ၂၀၁၆-၂၀၂၅ အာဆီယံမူပိုင်ခွင့်အခွင့်အရေးများဆိုင်ရာလုပ်ငန်း အစီအစဉ်များမှ လုပ်ဆောင်ရန်ကျန်ရှိသော လုပ်ငန်းများအား အကောင်အထည်ဖော်မှုအခြေအနေနှင့် ၂၀၂၅ အလွန်ဆောင်ရွက်မည့် လုပ်ငန်းအစီအစဉ်များပြုစုခြင်းဆိုင်ရာကိစ္စရပ်များ စသည့်မူပိုင်ခွင့် ဆိုင်ရာကိစ္စရပ်များကို ဆွေးနွေးမည်ဖြစ်ပါသည်။

          ထို့အပြင် အဆိုပါအစည်းအဝေးနှင့်အတူ မူပိုင်ခွင့်ဆိုင်ရာ မိတ်ဖက်အဖွဲ့အစည်းများဖြစ်ကြသည့် ကမ္ဘာ့မူပိုင်ခွင့်အဖွဲ့(WIPO)၊ တရုတ်ပြည်သူ့သမ္မတနိုင်ငံမူပိုင်ခွင့်အဖွဲ့အစည်း(CNIPA)၊ ကိုရီးယားသမ္မတ နိုင်ငံမူပိုင်ခွင့်ရုံး(KIPO)၊ အမေရိကန်ပြည်ထောင်စု တီထွင်မှုနှင့်ကုန်အမှတ်တံဆိပ် မူပိုင်ခွင့်ရုံး(USPTO)၊ ဂျပန်နိုင်ငံတီထွင်မှုမူပိုင်ခွင့်ရုံး (JPO)တို့နှင့် ဌာနကြီးမှူးများတွေ့ဆုံသည့် မူပိုင်ခွင့်ဆိုင်ရာအစည်းအဝေး များကိုလည်း ပူးတွဲကျင်းပလျက်ရှိပါကြောင်း သတင်းရရှိပါသည်။

နေပြည်တော်၊ ဩဂုတ် ၅ ဒေသဆိုင်ရာအညွှန်း သိကောင်းစရာများနှင့်စပ်လျဉ်း၍ စကားဝိုင်းဆွေးနွေးပွဲကို ၂၀၂၄ ခုနှစ်၊ ဩဂုတ်လ ၅ ရက်နေ့၊ နံနက် ၁၀ နာရီအချိန်တွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မူပိုင်ခွင့်ဦးစီးဌာန၊ ရုံးအမှတ်(၅၂)၊ အစည်းအဝေးခန်းမတွင်ကျင်းပခဲ့ရာ မူပိုင်ခွင့်ဦးစီးဌာန ဒုတိယညွှန်ကြားရေးမှူးချုပ် ဒေါက်တာနှင်းနွယ်အေးက အဖွင့်အမှာစကားပြောကြားခဲ့သည်။ ဒေသဆိုင်ရာအညွှန်းနှင့်စပ်လျဉ်းသည့် စကားဝိုင်းဆွေးနွေးပွဲသို့ မူပိုင်ခွင့်ဦးစီးဌာန ညွှန်ကြားရေးမှူးများ၊ အရာထမ်း/အမှုထမ်းများက In person တက်ရောက်ခဲ့ကြပြီး အထက်မြန်မာပြည်ရုံးခွဲ (မန္တလေး)နှင့် အောက်မြန်မာပြည်ရုံးခွဲ (ရန်ကုန်) တို့မှ ညွှန်ကြားရေးမှူးနှင့်အရာထမ်း/အမှုထမ်းများက Virtual ဖြင့် တက်ရောက်ကြသည်။ အဆိုပါ စကားဝိုင်းဆွေးနွေးပွဲတွင် ဒုတိယညွှန်ကြားရေးမှူးချုပ်က အဖွင့်အမှာစကားပြောကြားရာတွင် ဒေသဆိုင်ရာအညွှန်းသည်လည်း မူပိုင်ခွင့်အမျိုးအစားတစ်ခုဖြစ်၍ မူပိုင်ခွင့်ဦးစီးဌာနမှ အရာထမ်း၊ အမှုထမ်းများသိရှိထားရန် လိုအပ်သည့်အတွက် ယခုလို စကားဝိုင်းဆွေးနွေးပွဲကို ကျင်းပရခြင်းဖြစ်ပါကြောင်း၊ ဒေသဆိုင်ရာအညွှန်းနှင့်စပ်လျဉ်း၍ ကုန်အမှတ်တံဆိပ်မူပိုင်ခွင့်ဥပဒေအခန်း (၁၆)တွင် ပြဋ္ဌာန်းထားရှိခြင်းဖြစ်ပြီး အဆိုပါပြဋ္ဌာန်းချက်များကို အကောင်အထည်ဖော်နိုင်ရေးအတွက် နည်းဥပဒေပြဋ္ဌာန်းနိုင်ရေးရေးဆွဲခြင်း၊ သက်ဆိုင်ရာဌာနများသို့ သဘောထားမှတ်ချက်များတောင်းခံခြင်း၊ လုပ်ငန်းညှိနှိုင်းအစည်းအဝေးများ ကျင်းပခြင်းတို့ကို ဆောင်ရွက်လျက်ရှိပြီး အတည်ပြုထုတ်ပြန်နိုင်ရေးအတွက် ပြင်ဆင်ဆောင်ရွက်လျက်ရှိပါကြောင်းနှင့် ဒေသဆိုင်ရာအညွှန်းနှင့်စပ်လျဉ်း၍ ညွှန်ကြားရေးမှူးများက ရှင်းလင်းသွားမည်ဖြစ်ရာ သေချာစွာမှတ်သားစေလိုကြောင်း ပြောကြားခဲ့သည်။ ဆက်လက်၍ မူပိုင်ခွင့်ဦးစီးဌာန ညွှန်ကြားရေးမှူးများဖြစ်သည့် ဒေါက်တာစိမ့်သန္တာထွန်း၊ ဒေါက်တာခင်စန္ဒာဝင်းနှင့် ညွှန်ကြားရေးမှူး ဒေါ်တင်မျိုးမြင့်တို့က ဒေသဆိုင်ရာအညွှန်း သိကောင်းစရာများနှင့်စပ်လျဉ်း၍ အသီးသီးရှင်းလင်းဆွေးနွေးပြောကြားခဲ့ပြီး စကားဝိုင်းဆွေးနွေးပွဲသို့ တက်ရောက်လာသူများက သိရှိလိုသည်များကို မေးမြန်းခြင်းများအပေါ် တာဝန်ရှိသူများက ပြန်လည်ရှင်းလင်းဖြေကြားခဲ့ကာ စကားဝိုင်းကို ရုပ်သိမ်းခဲ့ကြောင်း သတင်းရရှိသည်။