Department of Trade

နေပြည်တော်၊   ဇူလိုင်လ ၄

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မူပိုင်ခွင့်ဦးစီးဌာနအနေဖြင့် နည်းပညာနှင့် တီထွင်ဆန်းသစ်မှုအထောက်အကူပြုစင်တာ(TISCs)များမှ တာဝန်ရှိသူများအတွက် တီထွင်မှု မူပိုင်ခွင့်လျှောက်ထားခြင်းဆိုင်ရာ အသိပညာပြန့်ပွားရေးသင်တန်းဖွင့်ပွဲအခမ်းအနားကို ယနေ့နံနက် ၁၀ နာရီအချိန်တွင် နေပြည်တော်ရှိ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မူပိုင်ခွင့်ဦးစီးဌာန၊ ရုံးအမှတ် (၅၂)၌ ကျင်းပခဲ့ရာ မူပိုင်ခွင့်ဦးစီးဌာန ညွှန်ကြားရေးမှူးချုပ် ဒေါက်တာမိုးမိုးသွယ် က အဖွင့်အမှာစကားပြောကြားခဲ့သည်။

   တီထွင်မှုမူပိုင်ခွင့်ဆိုင်ရာ အသိပညာပြန့်ပွားရေးသင်တန်းကို မူပိုင်ခွင့်ဦးစီးဌာနမှ ညွှန်ကြားရေးမှူးချုပ်၊ ညွှန်ကြားရေးမှူးများ၊ တာဝန်ရှိသူများနှင့် ပညာရေးဝန်ကြီးဌာန၊ သိပ္ပံနှင့်နည်းပညာဝန်ကြီးဌာန၊ ကျန်းမာရေးဝန်ကြီးဌာနနှင့် စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာနအောက်ရှိတက္ကသိုလ်၊ သုတေသန ဌာနများမှ တာဝန်ရှိသူများ စုစုပေါင်း (၅၇)ဦးခန့် တက်ရောက်ခဲ့ကြသည်။

   အဆိုပါ အသိပညာပြန့်ပွားရေးသင်တန်းတွင် ညွှန်ကြားရေးမှူးချုပ်က တီထွင်မှုမူပိုင်ခွင့် ဥပဒေကို ၂၀၂၄ခုနှစ်၊ မေလ ၃၁ ရက်နေ့တွင် အာဏာတည်ခဲ့ပါကြောင်း၊ တီထွင်မှုမူပိုင်ခွင့်ဥပဒေတွင် တီထွင်မှုနှင့် အသေးစားတီထွင်မှုများကို အကာအကွယ်ပေးမည့် လျှောက်ထားချက်များကို ၂၀၂၄ ခုနှစ်၊ အောက်တိုဘာလတွင် စတင်လက်ခံနိုင်ရန် ဆောင်ရွက်လျက်ရှိပါကြောင်း၊ တီထွင်မှုမူပိုင်ခွင့် လျှောက်ထားချက်များကို တီထွင်သူ၊ လျှောက်ထားသူများအနေဖြင့် ကိုယ်တိုင်လျှောက်ထားနိုင်သည့်အပြင် ကိုယ်စားလှယ်များ၊ တီထွင်မှုမူပိုင်ခွင့် အကျိုးဆောင်ကိုယ်စားလှယ်များမှတစ်ဆင့် လျှောက်ထားနိုင်မည်ဖြစ်ပါကြောင်း၊ တီထွင်မူပိုင်ခွင့်စနစ်သည် တီထွင်ဖန်တီးနိုင်မှုများကို အားပေးခြင်းဖြင့် ဆန်းသစ်တီထွင်မှုများ တိုးတက်မှုသာမက မြန်မာနိုင်ငံ၏ စီးပွားရေးတိုးတက်မှုနှင့် ဖွံ့ဖြိုး တိုးတက်မှုအတွက် ထောက်ပံ့ပေးနိုင်သည့်စနစ် ဖြစ်ပါကြောင်း၊ တီထွင်မှုမူပိုင်ခွင့်စနစ်ကို ကျင့်သုံး ဆောင်ရွက်ခြင်းဖြင့် တီထွင်မှုများကို အကာအကွယ်ပေးနိုင်ခြင်း၊ နည်းပညာ၊ ရင်းနှီးမြှုပ်နှံမှု၊ ကုန်သွယ်ရေးနှင့် ကူးသန်းရောင်းဝယ်ရေးလုပ်ငန်းများ ဖွံ့ဖြိုးတိုးတက်နိုင်ခြင်း၊ အလုပ်အကိုင်အခွင့် အလမ်းများ များပြားလာနိုင်ခြင်း၊ ပြည်သူများ၏ အကျိုးစီးပွားများ မြင့်မားတိုးတက်လာနိုင်ခြင်း စသည့်အကျိုးကျေးဇူးများစွာ ရရှိလာနိုင်မည်ဖြစ်ပါကြောင်းပြောကြားခဲ့သည်။

   ထို့နောက် မူပိုင်ခွင့်ဦးစီးဌာနမှ ညွှန်ကြားရေးမှူး ဒေါက်တာပွင့်ဖြိုးဝင်းက တီထွင်မှုမူပိုင်ခွင့် လျှောက်ထားခြင်းဆိုင်ရာအကြောင်း သိကောင်းစရာများနှင့်စပ်လျဉ်း၍ ရှင်းလင်းပြောကြားခဲ့ပြီး တက်ရောက်လာသူများက သိရှိလိုသည်များကို မေးမြန်းခြင်းများအပေါ် ပြန်လည်ရှင်းလင်းဖြေကြားခဲ့ပါသည်။ အဆိုပါ အသိပညာပြန့်ပွားရေးသင်တန်းကို တစ်ပတ်လျှင် (၁)ရက်ဖြင့် (၈)ပတ်ကြာ သင်ကြားသွားမည်ဖြစ်ကြောင်း သတင်းရရှိသည်။

နေပြည်တော်၊   ဇွန်လ ၂၁

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မူပိုင်ခွင့်ဦးစီးဌာနသည် တက္ကသိုလ်၊ ကောလိပ်များမှ ဆရာ/ဆရာမများ၊ ကျောင်းသား/သူများအား မူပိုင်ခွင့်ဆိုင်ရာအသိပညာများရရှိစေရန်အတွက် မူပိုင်ခွင့်ဆိုင်ရာ အသိပညာပေးဆွေးနွေးဟောပြောပွဲကို ယနေ့ နေ့လယ် ၁၄:၃၀ နာရီ အချိန်တွင် Naypyitaw State Academy ၌ ကျင်းပခဲ့သည်။

    အဆိုပါ အသိပညာပေးဆွေးနွေးဟောပြောပွဲကို မူပိုင်ခွင့်ဦးစီးဌာနနှင့် ပညာရေးဝန်ကြီးဌာန အောက်ရှိ Naypyitaw State Academy တို့ ပူးပေါင်းကျင်းပခြင်းဖြစ်ပြီး၊ မူပိုင်ခွင့်ဦးစီးဌာနမှ ညွှန်ကြားရေးမှူးချုပ်နှင့် တာဝန်ရှိသူများ၊ Naypyitaw State Academy မှ ဒုတိယပါမောက္ခချုပ်၊ ဆရာ/ဆရာမများနှင့် ကျောင်းသား/သူများ စုစုပေါင်း(၃၀၀) ဦးခန့်တက်ရောက်ခဲ့ကြသည်။

 ဆွေးနွေးဟောပြောပွဲတွင် ညွှန်ကြားရေးမှူးချုပ် ဒေါက်တာမိုးမိုးသွယ်က မူပိုင်ခွင့်ဦးစီးဌာန၏အကောင်အထည်ဖော် ဆောင်ရွက်နေမှုအခြေအနေများကို မိတ်ဆက်ပြောကြားခဲ့ပြီး   မူပိုင်ခွင့်၏ တန်ဖိုးကိုသိရှိ၍  မူပိုင်ခွင့်အကာအကွယ်ယူခြင်းဖြင့် အကျိုးကျေးဇူးများစွာရရှိလာမည်ဖြစ်ကြောင်း၊ လူငယ်တီထွင်ဖန်တီးသူများပေါ်ပေါက်၍ အခြားသူများ၏ မူပိုင်ခွင့်ကို တန်ဖိုးထားလေးစားသည့် ယဉ်ကျေးမှုတစ်ရပ် ပေါ်ပေါက်လာမည်ဖြစ်ကြောင်းနှင့် လူငယ်များ၏တီထွင်ဖန်တီးမှုများ တိုးမြှင့်စေခြင်းဖြင့် အနာဂတ်မြန်မာနိုင်ငံ၏ ကဏ္ဍပေါင်းစုံဖွံ့ဖြိုးတိုးတက်လာစေမည်ဖြစ်ကြောင်း မိတ်ဆက်ပြောကြားခဲ့ပါသည်။

   ထို့နောက် မူပိုင်ခွင့်ဦးစီးဌာနမှ ညွှန်ကြားရေးမှူး ဒေါက်တာပွင့်ဖြိုးဝင်းက မူပိုင်ခွင့်ဥပဒေများ၊ မူပိုင်ခွင့်ဆိုင်ရာသိကောင်းစရာများအကြောင်းအား ရှင်းလင်းဆွေးနွေးခဲ့ပြီး ဆရာ/ဆရာများ၊ ကျောင်းသား/သူများက သိရှိလိုသည်များကို မေးမြန်းခြင်းများအပေါ် တာဝန်ရှိသူတို့က ပြန်လည်ရှင်းလင်း ဖြေကြားခဲ့ကြပြီး ဆွေးနွေးဟောပြောပွဲကို ရုပ်သိမ်းခဲ့ကြောင်း သတင်းရရှိသည်။

နေပြည်တော်၊ ဇွန်လ ၁၇

   ကုန်အမှတ်တံဆိပ်မှတ်ပုံတင်ခြင်းဆိုင်ရာ ကိုယ်စားလှယ်သင်တန်းအမှတ်စဉ် (၁/၂၀၂၄) ဖွင့်ပွဲ အခမ်းအနားကို ၂၀၂၄ ခုနှစ်၊ ဇွန်လ ၁၇ ရက်နေ့၌ နေပြည်တော်ရှိ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မူပိုင်ခွင့်ဦးစီးဌာန၊ ရုံးအမှတ်(၅၂)တွင် Virtual စနစ်ဖြင့် ကျင်းပခဲ့ရာ မူပိုင်ခွင့်ဦးစီးဌာန ညွှန်ကြားရေးမှူးချုပ်  ဒေါက်တာမိုးမိုးသွယ်က အဖွင့်အမှာစကားပြောကြားသည်။

   အမှတ်တံဆိပ်မှတ်ပုံတင်ခြင်းဆိုင်ရာ ကိုယ်စားလှယ်သင်တန်းသို့ မူပိုင်ခွင့်ဦးစီးဌာန ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ်၊ ညွှန်ကြားရေးမှူးများ၊ တာဝန်ရှိသူများနှင့်  သင်တန်းသား/သူများ(၇၈)ဦး တက်ရောက်ကြသည်။

   အဆိုပါသင်တန်းကို မူပိုင်ခွင့်ဦးစီးဌာန ညွှန်ကြားရေးမှူးချုပ်က အဖွင့်အမှာစကားပြောကြားရာ၌ ကိုယ်စားလှယ်ဆောင်ရွက်ခွင့် (WIPO File Account) ရရှိထားသူများနှင့် အမှတ်တံဆိပ်မှတ်ပုံတင်ခြင်းများ လက်ခံဆောင်ရွက်ရာတွင် လျှောက်ထားသူများ ကိုယ်စားဆောင်ရွက်မည့်ကိုယ်စားလှယ်များအား ကုန်အမှတ်တံဆိပ်မူပိုင်ခွင့်ဥပဒေ၊ နည်းဥပဒေနှင့် အမှတ်တံဆိပ်များအကြောင်း၊ အမှတ်တံဆိပ်မှတ်ပုံတင်ခြင်းနှင့်စပ်လျဉ်းသည့် သတ်မှတ်ချက်များ၊ ကန့်သတ် ချက်များအား ပြည့်စုံစွာသိရှိနားလည်ပြီး အဆင်ပြေချော့မွေ့စွာ လျှောက်ထားနိုင်စေရန် ရည်ရွယ်၍ ဖွင့်လှစ်ခြင်းဖြစ်ပါကြောင်း၊ မူပိုင်ခွင့်ဦးစီးဌာန၏ အဓိကလုပ်ငန်းဖြစ်သည့် မူပိုင်ခွင့်မှတ်ပုံတင်ခြင်းလုပ်ငန်းများကို အောင်မြင်စွာဆောင်ရွက်နိုင်မည့်အပြင် မြန်မာနိုင်ငံတွင် မူပိုင်ခွင့်စနစ်တစ်ရပ်ကို ထူထောင်ရန်အတွက်လည်း ကြိုးပမ်းဆောင်ရွက်လျက်ရှိပါကြောင်း၊ ပြည်တွင်းမှတ်ပုံတင်စနစ်ကို ထူထောင်ရုံသာမက နောင်အခါတွင် အပြည်ပြည်ဆိုင်ရာမှတ်ပုံတင်စနစ် (International Filing System)ကိုလည်း ကျင့်သုံးဆောင်ရွက်သွားမည်ဖြစ်ပါကြောင်း၊ သင်တန်းတွင် ကိုယ်စားလှယ်တစ်ဦး၏ အခန်းကဏ္ဍ၊ မှတ်ပုံတင်လျှောက်ထားခြင်းနှင့် စပ်လျဉ်း၍ ကိုယ်စားလှယ်များ သိရှိလိုက်နာသင့်သည့် အချက်များ၊ မူပိုင်ခွင့်ဆိုင်ရာ နိုင်ငံတကာပူးပေါင်း ဆောင်ရွက်မှုများနှင့် အပြည်ပြည်ဆိုင်ရာ သဘောတူစာချုပ်များအကြောင်း၊  ကုန်အမှတ်တံဆိပ်မူပိုင်ခွင့် ဥပဒေ၊ နည်းဥပဒေနှင့် အမှတ်တံဆိပ်အကြောင်းသိကောင်းစရာများ၊ မှတ်ပုံတင်ခွင့်ရှိသော အမှတ်တံဆိပ်နှင့် မှတ်ပုံတင်ခွင့်မရှိသော အမှတ်တံဆိပ်အကြောင်း၊ အမှတ်တံဆိပ်မှတ်ပုံတင်ခြင်းနှင့်စပ်လျဉ်းသည့် လျှောက်လွှာများနှင့် အခကြေးငွေများ၊ အမှတ်တံဆိပ်မှတ်ပုံတင်လျှောက်ထားခြင်းဆိုင်ရာ လျှောက်လွှာပုံစံများအား ရှင်းလင်းခြင်း၊ အပြည်ပြည်ဆိုင်ရာကုန်ပစ္စည်းနှင့်ဝန်ဆောင်မှုများ  အမျိုးအစားခွဲခြားခြင်းအား ရှင်းလင်းခြင်းနှင့်လက်တွေ့လုပ်ဆောင်ခြင်း၊ Online Filing စနစ်ဖြင့် အမှတ်တံဆိပ်မှတ်ပုံတင် လျှောက်ထားခြင်းအတွက် နည်းပညာပိုင်း ဆိုင်ရာသိကောင်းစရာများနှင့် Trademark(MM) Database Searching စာတွေ့လက်တွေ့ ရှင်းလင်းသင်ကြားခြင်းများကို သင်ကြားပို့ချပေးသွားမည်ဖြစ်ပြီး အဆိုပါ သင်တန်းကို ဇွန်လ (၁၇) ရက်နေ့မှ (၂၄) ရက်နေ့ထိ (ရုံးပိတ်ရက်မပါ) (၅)ရက်ကြာ ဖွင့်လှစ်သင်ကြားသွားမည်ဖြစ်ကြောင်း သတင်းရရှိသည်။