ဈေးသက်သာတဲ့ ဆန်အမြောက်အမြား တင်သွင်းခြင်းကြောင့် တရုတ်လယ်သမားနဲ့ ဆန်စက်လုပ်ငန်းရှင်များထိခိုက်
တရုတ်နိုင်ငံအတွင်း မျှော်မှန်းမထားတဲ့အထိ ဆန်တင်သွင်းမှု မြင့်တက်လာတာကြောင့် နိုင်ငံအတွင်းရှိ လယ်သမား နဲ့ အသေးစားဆန်စက်လုပ်ငန်းရှင်များ ဆုံးရှုံးမှုနဲ့ရင်ဆိုင်နေရတယ် လို့သိရပါတယ်။ တရားဝင်စာရင်းများအရ ၂၀၁၂ ဇန် နဝါရီလမှ အောက်တိုဘာလအထိ ဆန်တန်ချိန် ၂ သန်းနီးပါး တင်သွင်းခဲ့ရာ ယခင်နှစ်ကာလတူ တင်သွင်းတဲ့ တန်ချိန် ၅ သိန်းရဲ့ ၄ ဆ နီးပါးရှိခဲ့ပါတယ်။ စုစုပေါင်းတင်သွင်းမှုဟာ ၂၀၁၂ မှာ တန်ချိန် ၂ ဒသမ ၆ သန်းနဲ့ ၂၀၁၃ မှာ တန်ချိန် ၂ ဒသမ ၃ သန်းခန့်အထိ ရှိမယ်လို့ ဆိုပါတယ်။ယခုနှစ်အစပိုင်းမှာ တရုတ်အစိုးရ က လုံးပုစပါး အနိမ့်ဆုံး ဝယ်ယူ ရေးကို ၁၇ ရာခိုင်နှုန်းတိုးပြီး၊ တစ်တန် ကန်ဒေါ်လာ ၃၉၅ သတ်မှတ်ခဲ့ပါတယ်။ တရုတ်အစိုးရအနေနဲ့ ဈေးကွက် ပေါက်ဈေးမှာ အစိုးရသတ်မှတ်တဲ့ အနိမ့်ဆုံး ဝယ်ယူဈေး အောက်ရောက်မှသာ တောင်သူတွေဆီက စပါး ဝယ်ယူတာ ဖြစ်ပါတယ်။ တင်သွင်းမှုမြင့်တက်ခြင်းဟာ ပြည်တွင်းဈေးနဲ့ သက် သာတဲ့တင်သွင်းဆန်ဈေးအကြား ကွာဟမှု ကြီးမားတာကြောင့်လို့ ကျွမ်းကျင်သူတွေ ဆိုပါတယ်။ FAO စာရင်းများ အရ တရုတ်နိုင်ငံအတွင်း ရိုးရိုးဆန်ဈေးဟာ စက်တင်ဘာ လမှာ တစ်တန် ကန်ဒေါ်လာ ၆၂၅ ရှိလို့ ပြီးခဲ့တဲ့ နှစ်ထက် ၁၁ ရာခိုင်နှုန်း မြင့်တက်ခဲ့တယ်လို့ သိရပါတယ်။ အဲဒီ ပမာဏဟာ ဗီယက်နမ် အဆင့်မြင့် ၅ မှတ် ဆန်ဈေး ကန် ဒေါ်လာ ၄၁၅ ထက် ၅၀ ရာခိုင်နှုန်းခန့် ပိုမိုနေပါတယ်။ ဆန်တင်သွင်း မှုမြင့်တက်ခြင်းဟာပြည်တွင်းဈေးကွက် အတွင်းဆန်ဈေးကို ဆွဲချသလိုဖြစ်နေလို့ပြည်တွင်းလယ်သမားရော အသေးစားဆန်စက်လုပ်ငန်းရှင်တွေရဲ့ဝင်ငွေကို ထိခိုက်စေပါ တယ်။ ပြည်တွင်းလယ်သမားများရဲ့ ပြောကြား ချက်အရ စပါးဝယ်ယူဈေးက ပြီးခဲ့တဲ့နှစ်ထက် ၆ ရာခိုင်နှုန်းခန့် ကျဆင်းပြီး၊ တစ်တန် ကန်ဒေါ်လာ ၄၄၅ သာရှိတယ်လို့ ဆိုပါ တယ်။ ဗီယက်နမ်နဲ့ ပါကစ္စတန်မှ ဈေးသက်သာတဲ့တင်သွင်း ဆန်တွေများစွာ ဝင်ရောက်တာကြောင့်ပြုပြင်ပြီး ဆန်ဈေးကကျဆင်းခဲ့တယ်လို့ ဆန်စက်လုပ်ငန်းရှင်တွေက ဆိုပါတယ်။ ဆန်တင်သွင်းမှုလျှော့ချဖို့ အစိုးရအနေနဲ့ အနိမ့်ဆုံး ဝယ်ယူဈေးကို လျှော့ချ သင့်တယ်လို့ လေ့လာဆန်းစစ် သူများ ကဆိုပါတယ်။ ဒါပေမယ့် တရုတ်နိုင်ငံရဲ့ ပြည်တွင်းဝယ်လိုအား က တန်ချိန် ၁၃၉ ဒသမ ၅ သန်းခန့်နဲ့ ပြည်တွင်း ထုတ်လုပ်မှု တန်ချိန် ၁၄၀ ဒသမ ၇ သန်းနီးပါးဖြစ်လို့ ဝယ်ယူဈေးလျှော့ချ ပေးခြင်းဖြစ်လာဖွယ်မရှိကြောင်း၊ အနာဂတ်ကာလမှာ တရုတ်နိုင်ငံ ဟာ ပြည်တွင်းထုတ်ဆန်ထက်တင်သွင်းလာမယ့် ဆန် ကိုပဲ စားသုံးမှု မြင့်တက်လာနိုင်ကြောင်းသုတေသီများရဲ့ သုံး သပ်ချက်ကို ချိုင်းနားဒေးလီး သတင်း စာမှာ ဖော်ပြထားပါတယ်။
Ref :Posted on 26 December, 2012
ဒီဇင်ဘာလ ၁၁ရက်နေ့မှာ ကမ္ဘာ့ရော်ဘာဈေးနှုန်းတွေ ဟာ ယခင်သီတင်းပတ်ဈေးနှုန်းထက် အနည်းငယ် ဈေးမြင့် လာတယ်။ ကမ္ဘာ့ရော်ဘာ သုံးစွဲမှုအများဆုံး တရုတ်နိုင်ငံ မှာ နိုဝင်ဘာလအတွင်း လက်လီအရောင်းနှုန်း နဲ့ စက်ရုံ၊ အလုပ်ရုံ တွေရဲ့ ကုန်ထုတ်လုပ်မှုတိုးတက်ခဲ့တယ်ဆိုတဲ့ သတင်းကြောင့် ရော်ဘာဝယ်လိုအား ကောင်းမွန် လာမယ် ခန့်မှန်းကြတဲ့ အတွက် ဈေးမြင့်လာခြင်းဖြစ်တယ်။ ဒီဇင်ဘာလ ၄ ရက်နေ့က ထိုင်း ရော်ဘာ ဈေးကွက်မှာ မှိုင်းခံရော်ဘာအဆင့်-၅(RSS-5)က တစ်တန်ကို ၃၀၀၃ ဒေါ်လာသာ ရှိသော်လည်း ဒီဇင်ဘာလ ၁၁ ရက်နေ့မှာ တစ်တန်ကို ၃၀၁၁ ဒသမ ၅၀ ဒေါ်လာအထိ ရောက်ရှိလာတယ်။ မလေးရှားရော်ဘာ (တာယာထုတ်လုပ် သော) SMR-20 ကလည်း ၎င်းင်းကာလအတွင်း တစ် တန်ကို ၁၈ ဒေါ်လာဈေးမြင့်လာပြီး တစ်တန်ကို ၂၈၄၆ ဒသမ ၅၀ ဒေါ်လာအထိ ရောက်ရှိခဲ့တယ်။ထိုင်းနိုင်ငံအစိုးရရဲ့ရော်ဘာဈေးကွက်အတွင်း ဝင် ရောက် ကာဈေးကွက်ပေါက်ဈေးထက် အမြင့်ဈေးပေးပြီး ရော်ဘာဝယ်ယူသိုလှောင်မှုအစီအစဉ် ဆက်လက် ဆောင်ရွက်နေခြင်း၊ ထိုင်း၊ မလေးရှားနဲ့ အင်ဒိုနီးရှားသုံးနိုင်ငံ ပေါင်းပြီး ရော်ဘာ တင်ပို့မှုလျော့ကျခြင်းတို့က လည်း ရော်ဘာဈေးနှုန်းကိုအထောက် အပံ့ပေးလျက်ရှိ တယ်။တာယာ ထုတ်လုပ်ဖို့မ လေးရှား ရော်ဘာ SMR-20 ကို ဝယ်လိုအား သိသိသာသာမြင့်မားလာခြင်း မရှိသော်လည်း လက်အိတ်နဲ့ ကျန်းမာရေးလုပ်ငန်းသုံး ပစ္စည်းများ ထုတ်လုပ်ဖို့အတွက်ရော်ဘာကိုဝယ်ယူလျက်ရှိနေခြင်းကလည်း ကမ္ဘာ့ရော်ဘာဈေးနှုန်းကျဆင်းမှုကို ထိန်းထားကြောင်း သိရ တယ်။
ထိုင်းနိုင်ငံ Siam Commercial Bank မှ ဥက္ကဌ Madam Kannikar Chalitapon ဦးဆောင်ပြီး စီးပွားရေးလုပ်ငန်းရှင် ၄၀ ဦး ပါဝင်သော လေ့လာရေးကိုယ်စားလှယ်အဖွဲ့တစ်ဖွဲ့သည် ၂၀၁၁ ခုနှစ်၊ စက်တင်ဘာလ ၂ ရက်နေ့နံနက် ၁၁ နာရီက နေပြည်တော်ရှိ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသို့ လာရောက် ၍ ကုန်သွယ်ရေးညွှန်ကြားမှုဦးစီးဌာန၊ ညွှန်ကြားရေးမှူးချုပ်အား တွေ့ဆုံဂါရဝပြုခဲ့ပါသည်။ ထို့နောက် မြန်မာနိုင်ငံ၏ ရင်းနှီးမြှုပ်နှံ မှု နှင့် ကုမ္ပဏီများ ညွှန်ကြားမှုဦးစီးဌာနမှ ဒုတိယညွှန်ကြားရေးမှူးချုပ် ဦးအောင်နိုင်ဦးကလည်းကောင်း၊ ပို့ကုန်သွင်းကုန်မူဝါဒနှင့် ကုန်သွယ်ရေးဆိုင်ရာကိစ္စရပ်များကို ကုန်သွယ်ရေးညွန်ကြားမှုဦးစီးဌာန၊ ညွှန်ကြားရေးမှူး၊ ဦးအောင်စိုးကလည်းကောင်း ရှင်းလင်း ပြောကြားပါသည်။ ထို့နောက် စီးပွားရေးလုပ်ငန်းရှင်များမှ သိရှိလိုသည်များကို မေးမြန်းရာ တာဝန်ရှိသူများက ပြန်လည် ဖြေကြားဆွေးနွေးခဲ့ပါသည်။ အဆိုပါကိုယ်စားလှယ်အဖွဲ့သည် မြန်မာနိုင်ငံတွင် လာရောက်၍ ရင်းနှီး မြှုပ်နှံမှုလုပ်ငန်းများနှင့် အကျိုးတူလုပ်ငန်းများ ပူးပေါင်းဆောင်ရွက်ရန် စိတ်ပါဝင်စားကြောင်း သိရပါသည်။